Memleket basshysynyń 10 myń turǵyn úshin keminde 100 turaqty jumys ornyn ashý jóninde bergen tapsyrmasyna sáıkes, Saıram aýdanyndaǵy 87 myńnan astam jumys kúshine bıylǵy jyly 870 nátıjeli jumys ornyn ashý kózdelýde. Bul týraly búgingi brıfıngte Saıram aýdanynyń ákimi Ulasbek Sádibekov málimdedi.
«Qazirgi tańda kásipkerlik sýbektileri esebinen 530 jańa jumys oryndary ashyldy. Bıylǵy jyly 6 ınvest jobany júzege asyrý arqyly 215 jumys ornyn, sondaı-aq aýyldy jerlerde otbasylyq kásipkerlikti damytý arqyly 214 jumys ornyn qurý josparlanýda» - dedi Ulasbek Sádibekuly.
Ótken jyly aýdan kóleminde «Eńbek» memlekettik baǵdarlamasyna jalpy 10 491 adam qatysyp, 6 973 adam turaqty jáne ýaqytsha jumyspen qamtylǵan.
Sonymen qatar, 2021 jyly az qamtylǵan 4 336 otbasyna 926,2 mln teńgege ataýly áleýmettik kómek berilip, 3 606 balaǵa 189,2 mln teńge kepildendirilgen áleýmettik paket usynyldy. Aýdan kóleminde kedeıshilik deńgeıi sońǵy úsh jyldyń nátıjesinde 2019 jylǵy 34,8%-dan 2021 jyly 10,3%-ǵa tómendegen. 2022 jylǵa turmys jaǵdaıy tómen dep tanylǵan 77 otbasyna kómek kórsetip, onyń ishinde 3 otbasyn turǵyn úımen qamtý kózdelýde
Túrkistan oblysynyń Óńirlik kommýnıkaııalar qyzmeti
