Qyzylorda turǵyny, qutqarýshy-cúńgýir, jaqynda ǵana otan aldyndaǵy boryshyn ótep kelgen Saǵyndyq Jubatqanov jan tásilim etti, dep jazady "Adyrna" tilshisi. Bul týraly Gúlmıra Ábiqaı jelilik paraqshasynda málimdedi.
Gúlmıra hanymnyń aıtýynsha, talaıdyń taǵdyryna arasha bolǵan, qanshama sýǵa batqan jandy qutqaryp qalǵan Saǵyndyq qan jetispeýshiliginen qaza tapqan. Ony kóshe buzaqylary pyshaqtap ketken.
"2 kún buryn túndeletip storıs saldym, Qyzylordalyq qutqarýshy-súńgýir Saǵyndyq Jubatqanovqa qan kerek dep. Tún bolǵanyna qaramastan ondaǵan oqyrmanym “men tapsyramyn” dep qýantty, tipti, Shıelilik kórermenim Gúlzınat Saǵyndyqova “Ýaıymdamańyz, ápke! Erteń qan tapsyrýǵa on shaqty adamdy ózim ertip baramyn” dep habarlasty, delingen jazbada.
Alaıda sol túni Saǵyndyqtyń qaıtys bolǵany týraly habar kelipti:
"Qandaı ókinishti… 29 jastaǵy jigit, áskerden kelgennen bergi jyldaryn sýǵa batqan talaı jandy ajaldan arashalaýmen ótkizgen adamnyń endi ózi joq. Qyzmet babymen ne dertten kóz jumsa bir jón, qaıdaǵy bir kóshe buzaqylarynyń pyshaǵynan ólip otyr. Búgin Jalaǵash aýdanynyń Jańatalap aýylynda jańa tómpeshik paıda boldy, janazasy shyǵaryldy. 90-ǵa kelgen Jubatqan atamyz tuńǵysh nemeresin óz qolynan attandyryp eseńgirep qaldy. Ákesi Keldibekke de bul qaıǵy ońaı tıgen joq. Artynan ergen eki baýyry men anasy qaldy ańyrap" dep jazdy Gúlmıra Ábiqaı.
Áskerden kelgeli tótenshe jaǵdaıdyń ortasynda júrgen jigit úılenip te úlgermegen eken. "Ómirge kelgendegi bar mıssııasy adam qutqarý bolǵandaı" deıdi kópshilik.
"Adyrna" ujymy marqumnyń ata-anasy men barsha jaqyndaryna qaıǵyra kóńil aıtady.
Saǵyndyryp keldi, saǵynysh bolyp ketti…
