İrannyŋ qazaqtar mekendeitın Gorgan qalasyna da zymyran atyldy, dep habarlaidy "Adyrna" ūlttyq portaly.
Būl turaly İranda tūratyn qazaq Jafar Şadkam özınıŋ äleumettık jelı paraqşasynda bölıstı.
"Myna videony maǧan Gorgannan jıbergen. Men özım qazır Mekkedemın. Qazaqtardy köşırıp alamyz deuşı edı. Eş habar joq. Jaǧdai qiyndap bara jatqan siiaqty" - dep jazdy ol.
Onyŋ sözıne qaraǧanda, Qazaqstanǧa öz betımen baryp, azamattyq alǧysy keletınderdıŋ köpşılıgınde qazaq ekenın rastaityn qūjattar joq. Sol sebeptı, olarǧa būrynǧydai viza beru de toqtatylǧan.
İrandaǧy qazaq diasporasy negızınen eldıŋ soltüstık-şyǧys bölıgınde, Tegerannan şyǧysqa qarai 400 şaqyrym jerde ornalasqan Gorgan qalasynda şoǧyrlanǧan. Būl qazaqtar eŋ köp tūratyn aimaq sanalady. Jalpy tūrǧyndar sany 300 myŋnan asatyn Gorgan - Gülstan provinsiiasynyŋ ortalyǧy. Provinsiia halqy 1 million 600 myŋnan astam adamdy qūraidy.
Qazaqtar Gülstandaǧy Bändar Türkımen, Aqqala jäne Gümbed qalalarynda da tūrady. Būl öŋırde qazaqtarmen qatar türkımender men kürd ūlttarynyŋ ökılderı de tyǧyz qonystanǧan. İrandaǧy qazaqtardyŋ jalpy sany şamamen 3-4 myŋ adamǧa jetedı.
