Qyrǧyzstan 12 jyldyq jalpy orta bılım beru jüiesıne tolyqtai köştı, dep habarlaidy "Adyrna" ūlttyq portaly.
Būl turaly Qyrǧyz Respublikasynyŋ oqu-aǧartu ministrı Doqtyrkül Kendırbaeva mälım ettı.
Ministrdıŋ aituynşa, būl – ūzaq jyldar boiy söz küiınde qalyp kelgen reformanyŋ naqty jüzege asqan kezeŋı.
«Bız endı 12 jyldyq bılım beru jüiesıne tolyq öttık. Būl – Qyrǧyzstan prezidentı Sadyr Japarovtyŋ saiasi erık-jıgerınıŋ arqasynda jüzege asty. Būl endı şeksız talqylau emes, ömırde ıske asqan reforma», – dedı ministr Kendırbaeva.
Ministrlıktıŋ mälımetınşe, jaŋa model eŋbek naryǧyna tüsetın salmaqty azaitady, al oquşylarǧa köbırek bılım men käsıbi daǧdy aluǧa mümkındık beredı. Joǧary synyptar beiındık oqytu negızınde kolledj ne tehnikum formatynda ūiymdastyrylady. Oquşylar bolaşaq mamandyǧyna sai pänderdı tereŋ oqi alady.
«Jaratylystanu jäne naqty ǧylymdarǧa basymdyq berıledı. Ekonomikaǧa osy salada mamandar asa qajet», – dedı Kendırbaeva.
Reforma aiasynda barlyq oqulyqtar endı tek memleket menşıgınde bolady. Jaŋa oqulyqtardy äzırleuge 200-den astam maman men tıl sarapşylary tartylǧan. Būǧan 2025 jyly 744 mln som bölıngen.
Sondai-aq, elde bılım beru jüiesı belsendı türde sifrlandyrylyp jatyr. Ata-analar balasyn 1-synypqa «Tunduk» elektrondy platformasy arqyly onlain tırkei alady. Mūǧalımder qaǧazbastylyqtan arylu üşın «E-Kundoluk» bıryŋǧai elektrondy kündelıgıne köşken.
1-synyp oquşylary endı jaŋartylǧan baǧdarlama boiynşa oqidy. Sabaq ūzaqtyǧy 35 minut, aptasyna bes kün bolady. Baǧdarlamaǧa «Qyrǧyz tılı», «Orys tılı», «Matematika», «Tılaşar», «Men jäne Älem» syndy pänder engen. Sabaqtar oiyn, interaktiv, ekskursiia türınde ötkızıledı.
Jaŋa jüiege ötu barysynda kadr tapşylyǧynyŋ aldyn alu üşın pedagogikalyq JOO-larda dualdy bılım beru jüiesı engızılmek. Üzdık studentterge 3-kurstan bastap mektepte jūmys ısteuge mümkındık berıledı. 2026 jyldan bastap mūǧalımderdıŋ jalaqysy kezeŋ-kezeŋımen ösırıledı. Al mūǧalım mamandyǧyna ötu baly 130-ǧa deiın köterılmek.
