Ǧylym jäne joǧary bılım ministrlıgı memlekettık grantqa ılıkpegen talapkerlerge ündeu jasady, dep habarlaidy «Adyrna» tılşısı.
«Är adam ömırınde türlı asulardan ötedı. Keide ülken jetıstıkke jetu üşın kışıgırım synaqtardan sürınbei ötu qajet bolady. Eger sız biyl memlekettık bılım grantyna ılıge almaǧan bolsaŋyz – būl ümıttıŋ üzılgenı emes! Grant – tek bır mümkındık. Al sızdıŋ boiyŋyzdaǧy talap, bılımge degen qūştarlyq pen tabandylyq – naǧyz jetıstıkke bastar basty küş. Maqsatyna sengen adam eşqaşan jarty jolda qalmaidy.
Aita keteiık, biylǧy konkursqa ötınış beruşıler sany ötken jylmen salystyrǧanda 9 myŋǧa köp, sondyqtan bäsekelestık te öte joǧary boldy. Alaida, bügıngı taŋda bılım aluǧa mümkındık beretın bır ǧana memlekettık grantpen şektelıp qaluǧa bolmaidy. Sızge qoljetımdı özge de granttar men jeŋıldıkter bar»,—delıngen habarlamada.
Ministrlık tömendegı balamaly mümkındıkterdı ūsyndy:
Universitetışılık rektor granttary
– belsendı, oqu ülgerımı jaqsy, äleumettık jaǧdaiy eskerılgen talapkerlerge oqu oryndary tarapynan berıletın arnaiy granttar. 2025 jyly mūndai granttardyŋ jalpy sany 2 000-nan asty. Mysaly, «Tūran-Astana» universitetı negızgı ŪBT-dan 100-den astam bal jinap, «Altyn belgı» iegerı atanǧan talapkerlerge 4 jyldyq rektorlyq granttar ūsynady. Al Halyqaralyq turizm jäne meimandostyq universitetı 680 maqsatty grant bölıp otyr.
Jergılıktı äkımdık granttary
– äleumettık az qamtylǧan nemese sūranysqa ie mamandyq ielerın daiyndau maqsatynda oblystyq, qalalyq äkımdıkter böletın bılım granttary. Mysaly, 2025 jyly jergılıktı atqaruşy organdar bakalavriat baǧdarlamalary boiynşa oquǧa 1 700-den astam bılım grantyn böldı.
Jūmys beruşılerdıŋ arnaiy granttary
– Būl granttar jūmys beruşı men joǧary oqu orny arasynda jasalǧan kelısım negızınde ūsynylady jäne bolaşaq mamandardy jūmyspen qamtu maqsatyn közdeidı.
Jeke demeuşıler men qorlardyŋ granttary
Mysaly, «Qazaqstan halqyna» qoǧamdyq qory 500 grant ūsynady, «KAZENERGY» qauymdastyǧy Soltüstık Kaspii jäne Qaraşyǧanaq jobalarynyŋ qarajaty esebınen injeneriia, IT, jaratylystanu ǧylymdary, auyl şaruaşylyǧy jäne qyzmet körsetu salalary boiynşa oquǧa tölem jasauǧa qoldau bıldıredı, «Qazatomönerkäsıp» ūlttyq atom kompaniiasy «Murager» bılım beru baǧdarlamasyn jüzege asyryp, auyldyq jerlerden şyqqan jastarǧa uran öndıru men öŋdeu, geologiialyq barlau, iadrolyq otyn siklı, energetika, ekologiia jäne ǧylym salalarymen bailanysty baǧyttarda granttar ūsynady.
Sonymen qatar keibır talapkerler granttan bas tartuy mümkın, osy kezde mümkındık kelesı joǧary bal jinaǧan talapkerlerge berıledı nemese aqyly bölımde oqudy bastap, keiıngı oqu kezeŋınde oqu ülgerımıne qarai bos grantqa ötuge mümkındık bar.
Ministrlık ökılderı talapkerlerdı ümıt üzbeuge, mümkındıkterdı zerttep, äreket etugeşaqyrdy.
«Sızdıŋ armanyŋyz – sızdıŋ bolaşaǧyŋyz. Ol jolda qoldau men mümkındık ärdaiym tabylady! Elıŋız ümıt artqan Sızderdei jastyŋ bolaşaǧy jarqyn bolaryna senemız!»—delıngen habarlamada.
Aita keteiık, biyl 77 myŋnan astam talapker grant iegerı atandy.
