Ile‑Alatau ūlttyq parkınde «Halyk» qaiyrymdylyq qory men Ekologiia jäne tabiǧi resurstar ministrlıgı bırlese jüzege asyryp jatqan «Halyk ormany» ekologiialyq jobasynyŋ jaŋa kezeŋı bastaldy.
Tauda atqan taŋ qatysuşalardy erekşe qarsy aldy: mūnda ylǧal topyraq iısı müŋkıp, samal jel esedı. Keşe ǧana boz jusan men quraǧan şöp basqan bauraida bügınde şyrşa köşetterı tızılıp tūr. Būl – eldıŋ erteŋıne degen qamqorlyq pen jaŋa ömırdıŋ jarqyn jarşysy.
İdeiadan bastalǧan orman
Joba tabiǧi ekojüielerdı qalpyna keltıruge jäne elımızdıŋ öŋırlerınde jaŋa jasyl aimaqtar qalyptastyruǧa baǧyttalǧan. Iske asyruǧa bes jylǧa 1 milliard teŋge bölıngen. Būlkezeŋ ışınde eldıŋ üş öŋırınde – Abai oblysynda, Ile‑Alatau ūlttyq parkınde jäne Astanadaǧy jasyl beldeude – 4 millionnan asa aǧaş otyrǧyzu josparlanǧan. Alǧaşqy kezeŋ «Semei ormany» rezervatynda öttı: örtten keiın ol jerde 800 myŋnan asa jas qaraǧai qalpyna keltırıldı. Kelesı kezeŋ – Ile‑Alatau: 5 gektar aumaqqa 14 myŋ şyrşa egılmek.
Ekologiia – nauqan emes, mädeniet
Ekologiia jäne tabiǧi resurstar vise‑ministrı Nūrbek Şarbiev tabiǧatty qorǧau – bır rettık bastama emes, ömır süru salty ekenın atap öttı.
«Tabiǧatqa janaşyrlyq tanytpaiynşa, ekonomikalyq ösım de ūzaqqa barmaidy. «Halyk ormany» jäne osyndai jobalar – ekologiialyq mädeniettı ömırımızdıŋ tabiǧi bölıgıne ainaldyru jolyndaǧy maŋyzdy qadam».
Bolaşaqqa salynǧan investisiia
«Halyk» qory Qamqorşylyq keŋesınıŋ müşesı Dauren Sartaev jobanyŋ ūzaqmerzımdı qūndylyǧyn erekşe atap öttı.
«Är egılgen aǧaş – qalanyŋ tynysyna, tūtynudan görı qamqorlyq jasau ädetıne salynǧan investisiia. «Halyk ormany» – tabiǧatty aialau mädenietın qalyptastyratyn mektep. Būl – bızden keiın de qalatyn mūra».
Nauqannan qozǧalysqa ainalǧan joba
Biyl köktemde «Halyk» qory bükıl eldı qamtyǧan GreenAct ekologiialyq chellendjın bastaǧan edı. Sol kezde myŋdaǧan oquşy, erıktı jäne kompaniia qyzmetkerlerı parkterdı tazalap, qaldyqtardy sūryptap, ösımdıkter otyrǧyzdy. Endı qor ekologiialyq baǧytta jūmysyn jalǧastyryp, «Halyk ormanyn» Qazaqstannyŋ jasyl aimaqtaryn qalpyna keltıru men keŋeituge arnalǧan ūzaqmerzımdı baǧdarlama retınde jüzege asyryp keledı.
Joba nege maŋyzdy?
Qazaqstan – keŋ baitaq dala. Bıraq öndırıs pen urbanizasiia keide tabiǧatqa kerı äserın tigızedı. Sondyqtan är jaŋa orman – jasyl aimaq emes, ornyqty damuǧa qosylǧan üles. «Halyk ormany» – qamqorlyq, sanaly közqaras, keler ūrpaq aldyndaǧy jauapkerşılık turaly joba. Būl – är balanyŋ öz aǧaşyn egıp, jyldar öte bırge öskenın köru.
ANYQTAMA
«Halyk ormany» jobasyn Timur Qūlybaevtyŋ «Halyk» qaiyrymdylyq qory jäne Ekologiia jäne tabiǧi resurstar ministrlıgı bırlesıp jüzege asyrady. Baǧdarlamaǧa 1 mlrd teŋge bölıngen. Bes jylda üş öŋırde 4 millionnan asa aǧaş otyrǧyzu josparlanǧan:
• Abai oblysy («Semei ormany» rezervattary);
• Ile‑Alatau ūlttyq parkı;
• Astananyŋ jasyl beldeuı.
