2026 jyldyŋ 1 qaŋtarynan bastap Özbekstanda qūrylys salasyna jaŋa talap engızıledı. Endı eldegı barlyq tūrǧyn üi keşenderınıŋ ataulary tek memlekettık – özbek tılınde jazyluy tiıs. Būl norma 22 qazanda qabyldanǧan ükımet qaulysynda körsetılgen, dep habarlaidy «Adyrna».
Jaŋa talaptyŋ maqsaty — özbek tılınıŋ märtebesın küşeitu
Qūjatta būl özgerıs qūrylys salasynda memlekettık tıldıŋ qoldanysyn arttyru jäne ūlttyq tıl saiasatyn nyǧaituǧa baǧyttalǧany aitylǧan.
Talap tek tūrǧyn üi keşenderınıŋ atauyna ǧana emes, qūrylyspen bailanysty barlyq aqparattyq materialdarǧa qatysty. Endı:
- qūrylys nysandaryndaǧy taqtaişalar men bannerler,
- ǧimarat tölqūjattary,
- uaqytşa qorşaulardaǧy jazbalar,
- qūrylys pasporttary — barlyǧy özbek tılınde jazyluy mındettı.
Sonymen qatar, 2025 jyldyŋ basynan bastap eldegı jarnamalyq mätınder men habarlandyrular da tek memlekettık tılde jariialanuǧa tiıs.
Ükımet qaulysynda körsetılgendei, qūrylysqa rūqsat alu, tehnikalyq baqylau jürgızu jäne nysandy paidalanuǧa qabyldau siiaqty barlyq räsımderge qatysty qūjattar memlekettık tılde äzırlenuı qajet.
Qazırgı taŋda Özbekstanda köptegen qūrylys kompaniialary tūrǧyn üi keşenderıne aǧylşyn tılınde atau berıp kelgen. Mysaly: New National Way, Favorit Residence, Kompakt House, Newport, Regnum Plaza jäne taǧy basqa ataular jiı kezdesedı.
Bırneşe kün būryn Özbekstan prezidentı Şavkat Mirziioev memlekettık tıldı damytu jönındegı jaŋa qaulyǧa qol qoiǧan bolatyn. Qūjatta özbek tılın qoǧamnyŋ barlyq salasynda keŋınen paidalanu, ony zamanaui tehnologiialarmen ūştastyru jäne oqytu sapasyn arttyru şaralary qamtylǧan.
2026 jyldan bastap barlyq memlekettık organdar men aimaqtyq äkımdıkterde (hokimiiattarda) ruhaniiat jäne memlekettık tıl jönındegı keŋesşı lauazymy engızıledı.
Būdan bölek, elde jasandy intellekt negızındegı özbek tılın qoldau platformasy äzırlenedı. 1 jeltoqsanǧa deiın jaŋa terminderdı tırkeu men talqylauǧa arnalǧan veb-resurs jasau boiynşa ǧylymi jobaǧa konkurs jariialanbaq.
