Jazuşy, filologiia ǧylymdarynyŋ kandidaty, Qazaqstannyŋ eŋbek sıŋırgen qairatkerı Maqsat Täj-Mūrat 66 jasynda ömırden öttı, dep habarlaidy "Adyrna" ūlttyq portaly.
Būl turaly Baqytjan Qosbarmaqov jelıdegı paraqşasynda habarlady.
"Aiy jetken aida öler,
Künı jetken künde öler,
Tura ajal kelgen jan
Taŋǧa jetpei tünde öler, - degen ras, Maqsat Täjımūrat aǧamyz qaitys bolypty", - delıngen jazbada.
Jazuşylar odaǧy da:
"Qazaqstan Jazuşylar odaǧynyŋ Basqarmasy körnektı jazuşy, esseist, ädebiettanuşy-ǧalym, filologiia ǧylymdarynyŋ kandidaty, Qazaqstan Jazuşylar odaǧynyŋ müşesı, Qazaqstannyŋ eŋbek sıŋırgen qairatkerı Maqsat Täj-Mūrattyŋ dünieden ötuıne bailanysty marqūmnyŋ jaqyndary men tuystaryna, barşa oqyrman qauymǧa qaiǧyryp köŋıl aitady", - dep resmi habar taratty.
Maqsat Änesūly Täjımūrat 1959 jyly Atyrau oblysy, Jylyoi audanyna qarasty Töles auylynda düniege kelgen. Ol äl-Farabi atyndaǧy Qazaq ūlttyq universitetınıŋ jurnalistika fakultetın jäne doktoranturasyn tämamdaǧan.
Ǧalym eŋbek jolyn «Bılım jäne Eŋbek» jurnalynda ädebi qyzmetker bolyp bastaǧan. Keiın «Sosialistık Qazaqstan» (qazırgı «Egemen Qazaqstan») gazetınde tılşı, «Gorizont» – «Örken» basylymynda bas redaktordyŋ orynbasary, «Jalyn» jurnalynda jauapty hatşy, Qazaqstan LKJO OK baspasöz sektorynyŋ meŋgeruşısı qyzmetterın atqarǧan.
Sondai-aq, äl-Farabi atyndaǧy Qazaq ūlttyq universitetınde aǧa oqytuşy, «Qazaq ädebietı» gazetınde bas redaktordyŋ orynbasary jäne «Ana tılı» ūlt aptalyǧy gazetınıŋ bas redaktory bolǧan.
Maqsat Täjımūrat qazaq ädebietınıŋ tarihy men tūlǧalaryn zertteuge zor üles qosty. Ol «Şäŋgerei: jasampazdyq ömırı» (1998), «Batys Alaşorda: bibliografiialyq sözdık täjıribesı» (2003) syndy eŋbekterdıŋ, sondai-aq «Ǧūmar Qaraş», «Käbisa jyl» atty ǧylymi-zertteu kıtaptardyŋ avtory.
Ǧalymnyŋ eŋbekterı Alaş qozǧalysy men onyŋ Batys bölımınıŋ tarihyna arnalǧan. Ol Alaş qairatkerlerı A.Abylaev, Q.Asanov, Ǧ.Älıbekov, Ǧ.Esşıǧūlov, K.Jälşov, A.Mämetov, N.İpmaǧambetov, S.Qaratıleuov syndy tūlǧalardyŋ ömır jolyn zerttep, olardyŋ eŋbekterın ǧylymi ainalymǧa engızdı.
