Baiqoŋyr ǧaryş ailaǧynan «Soiuz MS-28» ǧaryş kemesın ūşyru kezınde startqa qajet tehnikalyq qūrylym zaqymdanǧan, dep habarlaidy "Adyrna" ūlttyq portaly «Kommersant» basylymyna sıltep.
Oqiǧa 27 qaraşa künı ǧaryş kemesın ūşyru kezınde bolǧan.
BAQ mälımetınşe, jöndeu jūmystary alty aidan ekı jylǧa deiın sozyluy yqtimal. Osy uaqyt aralyǧynda Resei Baiqoŋyrdan zymyran ūşyra almauy mümkın.
«Roskosmos» ökılderı apat faktısın rastady. Ūşyru barysynda zymyran tasyǧyş qozǧalǧan sätte jyljymaly qyzmet körsetu kabinasyn jūlyp ketken. Saldarynan qūrylǧy şamamen 20 metr biıktıkten qūlap, qatty zaqymdanǧan.
Resei ǧaryş federasiiasynyŋ müşesı Aleksandr Hohlovtyŋ aituynşa, tūǧyrdy qalpyna keltıru oŋai şarua emes.
«Jaŋasyn jasauǧa öte köp uaqyt ketedı. Būryn mūndai tūǧyrlar men qyzmet körsetu kabinalary Ukrainadaǧy Kramatorskıde öndırılgen. Qazır Reseige ony nölden bastap qaita jasauǧa tura keledı», – dedı ol.
Sonymen bırge Hohlov balama şeşım bar ekenın atap öttı. Onyŋ aituynşa, Qazaqstanǧa muzeilık eksponat retınde berılgen Gagarin tūǧyrynyŋ kabinasyn uaqytşa paidalanu mümkındıgı qarastyryluy mümkın.
«Kabina jaqsy saqtalǧan. Eger Resei Qazaqstanmen kelısımge kelse, ony ornatu asa köp uaqyt pen qarjyny qajet etpeidı. Alaida būl täsıldıŋ özı 2026 jyldyŋ jazyna deiın sozyluy yqtimal», – deidı maman.
Al sarapşy Georgii Tişkin zaqym kölemı älı tolyq anyqtalmaǧandyqtan, jöndeu merzımı odan da ūzaq boluy mümkın ekenın aitady.
«Qai bölşekter bülıngenı naqty belgılı emes. Soǧan bailanysty qalpyna keltıru jūmystary bır jarym jyldan ekı jylǧa deiın sozyluy yqtimal», – dedı ol.
BAQ mälımdemesınşe, ailaqtyŋ ısten şyǧuy Halyqaralyq ǧaryş stansiiasynyŋ (HǦS) josparly jūmystaryna da äser ettı. Endı ǧaryşkerlerdı almastyru jäne jük jetkızu mäselesı AQŞ-pen kelısım arqyly jüzege asyryluy mümkın, qyzmet aqyly bolady.
