Memleket basşysynyŋ Qazaqstan halqyna Joldauynda öŋdeuşı önerkäsıptı damytuǧa basymdyq bere otyryp, jaŋa investisiialyq sikldı ıske qosu jönınde tapsyrma bergenı belgılı. Qazırgı taŋda Almaty qalasyndaǧy İndustriialyq aimaq pen «İnnovasiialyq tehnologiialar parkı» arnaiy ekonomikalyq aimaǧynda (AEA) öndırıs ornalastyruǧa investorlar tarapynan sūranys qoljetımdı ūsynystan asyp otyr. Būl turaly Ortalyq kommunikasiialar qyzmetınde ötken eseptık baspasöz konferensiiasynda Almaty qalasynyŋ äkımı Darhan Satybaldy mälımdedı, dep habarlaidy «Adyrna» ūlttyq portaly.
Qala äkımınıŋ aituynşa, investorlar sūranysyn qanaǧattandyru maqsatynda Almaty qalasynyŋ İndustriialyq aimaǧynyŋ aumaǧyn 634 gektarǧa keŋeitu josparlanyp otyr. Sonymen qatar, «İnnovasiialyq tehnologiialar parkı» arnaiy ekonomikalyq aimaǧynyŋ qyzmetı qaita qaralyp, onyŋ aumaǧyn ūlǧaitu jäne jeŋıldıkterdıŋ qoldanylu merzımın 2050 jylǧa deiın ūzartu közdelgen.
2026–2028 jyldar aralyǧynda Almaty qalasynda jalpy qūny 2,3 trln teŋgenı qūraityn 165 investisiialyq jobany ıske asyru josparlanuda. Būl jobalar äleumettık-ekonomikalyq damuǧa tyŋ serpın berıp, jaŋa öndırısterdıŋ ıske qosyluyna mümkındık aşady. Qabyldanǧan şaralardyŋ nätijesınde 2030 jylǧa qarai öŋdeuşı önerkäsıp önımderınıŋ eksporty 40 paiyzǧa artyp, 7 mlrd AQŞ dollaryna deiın jetedı dep kütılude.
Qalanyŋ zamanaui kölık qaŋqasyn qalyptastyru da negızgı basym baǧyttardyŋ bırı bolyp otyr. Almaty qalasy äkımdıgı radialdy joldardy tesu jäne ırı kölık airyqtaryn salu jūmystaryn Almaty oblysy aumaǧynda qala biudjetı esebınen jüzege asyru turaly şeşım qabyldaǧan. Darhan Satybaldynyŋ aituynşa, būl şaralar Ülken Almaty ainalma avtomobil jolymen (BAKAD) kölık integrasiiasyn jedeldetıp, aglomerasiia ışındegı bailanysty küşeitedı.
«Aldaǧy ekı jylda köşelerdı tesu, ekı kölık airyǧyn jäne ekı köpırdı qaita jaŋǧyrtu boiynşa 14 ırı joba jüzege asyrylady. Būl jol jelısınıŋ ötkızu qabıletın edäuır arttyruǧa mümkındık beredı. Sonymen qatar, Aqjar, Rahat-Mädeniet, Boraldai jäne Terektı şaǧynaudandarynda jalpy ūzyndyǧy 100 şaqyrymnan asatyn jol infraqūrylymyn damytu jūmystary aiaqtalady. Būǧan qosa, Almatynyŋ tau bökterı aimaǧynda 31 şaqyrym jol salu josparlanǧan», — dedı qala äkımı.
Qaladaǧy joldardyŋ jaqsy küide bolu deŋgeiın 95 paiyz deŋgeiınde saqtau maqsatynda jyl saiyn kemınde 250 şaqyrym jolǧa ortaşa jöndeu jürgızu közdelgen.
Äkımnıŋ mälımetınşe, 2026 jyly «Qalqaman» metro stansiiasy paidalanuǧa berıledı. Aldaǧy üş jyl ışınde bırınşı jelınıŋ üşınşı kezeŋı — Qalqamannan «Barlyq» bazaryna deiıngı bölıgı ıske qosylady. Sonymen qatar, metronyŋ ekınşı jäne üşınşı jelılerı jobalanyp, jedel avtobus baǧyty — BRT jüiesın damytu jūmystary jalǧasady. Būl jobalar jüzege asqan jaǧdaida, 2030 jylǧa qarai qoǧamdyq kölıktı kündelıktı paidalanuşylar sany 1,6 mln-nan 3 mln saparǧa deiın ösedı.
Darhan Satybaldy qoǧamdyq kölıktı damytu mäselesıne de toqtaldy. Onyŋ aituynşa, qalada üş jaŋa avtobus parkı salynyp jatyr, sondai-aq qoldanystaǧy parkterde gaz jäne elektrmen quattau stansiialary ornatylady. Avtobus jürgızuşılerınıŋ qauıpsızdıgı men demalysy üşın 20 aialdamalyq-ainalmaly alaŋ salynady. Sonymen qatar, qala men qala maŋyn bailanystyratyn üş kölık-auystyru toraby qūrylady. Elektrosamokattar men velosipedterge arnalǧan infraqūrylymdy damytu maqsatynda qosymşa 55 şaqyrym velojol jäne myŋnan astam tūraq orny salu josparlanǧan.
Qala aumaǧyndaǧy keŋıstıktık teŋsızdıktı joiu üşın qalalyq polisentrlerdı qalyptastyru jūmystary bastaldy. Ärbır polisentr tūrǧyndar üşın derbes tartylys nüktesıne ainalyp, qajettı infraqūrylymmen qamtamasyz etıledı.
«Jobanyŋ negızınde qalalyq belsendılıktıŋ jaŋa ortalyqtaryn qalyptastyru ideiasy jatyr. Polisentrlerdı damytu tūjyrymdamasyn äzırleuge halyqaralyq sarapşylar tartyldy. Alǧaşqy kezeŋde “Şyǧys qaqpasy” jäne “Batys” polisentrlerın damytu basym baǧyt bolady. Būl aumaqtarda taqyryptyq oiyn-sauyq parkı, Almaty su kanaly, Almaty AI Park, EXPO Center, jaŋa stadion jäne özge de maŋyzdy nysandar ornalastyrylady. Būl jobalar tarihi ortalyqqa tüsetın jüktemenı azaityp, qalanyŋ barlyq audandarynda ömır süru sapasyn arttyruǧa mümkındık beredı», — dedı Darhan Satybaldy.
Sonymen qatar, qalanyŋ joǧarǧy bölıgınde köpqabatty tūrǧyn üi qūrylysyna qoiylǧan moratoriidı eskere otyryp, Almaty qalasynyŋ Bas josparyn tüzetu jūmystary jürgızılıp jatyr.
