Ūlttyq äskeri-patriottyq ortalyqta «Bas redaktorlar kluby» qoǧamdyq bırlestıgı men Qazaqstan Respublikasynyŋ Qorǧanys ministrlıgı arasynda yntymaqtastyq turaly memorandumǧa qol qoiu räsımı öttı. Qūjat media qauymdastyq pen memlekettık sektor arasyndaǧy ornyqty serıktestıktı qalyptastyruǧa, sondai-aq äskeri taqyrypty käsıbi ärı jauapty türde jariialaudy damytuǧa baǧyttalǧan.
Memorandumǧa Bas redaktorlar klubynyŋ prezidentı, Qazaqstan Respublikasy Parlamentı Senatynyŋ deputaty Bibıgül Jeksenbai jäne Qorǧanys ministrınıŋ tärbie jäne ideologiialyq jūmys jönındegı orynbasary, vise-admiral Serık Burambaev qol qoidy.
Talqylauǧa Bas redaktorlar klubynyŋ müşelerı — jetekşı respublikalyq jäne öŋırlık būqaralyq aqparat qūraldarynyŋ basşylary, sondai-aq Qorǧanys ministrlıgınıŋ aqparat jäne kommunikasiialar, tärbie jäne ideologiialyq jūmys, ūiymdastyru-mobilizasiialyq baǧyt, äskeri bılım jäne ǧylym salalaryna jauapty qūrylymdyq bölımşelerınıŋ ökılderı qatysty. El öŋırlerındegı bas redaktorlar kezdesuge onlain formatta qosyldy.
Kezdesu barysynda Bibıgül Jeksenbai memorandumǧa qol qoiu memlekettık organ men media qauymdastyq arasyndaǧy senımdı nyǧaituǧa baǧyttalǧan sanaly qadam ekenın atap öttı:
— Prezident bırneşe ret atap ötkendei, bilıktıŋ aşyqtyǧy men qoǧammen adal dialog — ornyqty memlekettıŋ negızı. Osy tūrǧyda käsıbi media qauymdastyqtyŋ rölı airyqşa. Aqparattyq keŋıstıkte jauapkerşılık, däldık pen mazmūn standarttaryn aiqyndaityn — bas redaktorlar, — dedı ol.
Bas redaktorlar kluby prezidentınıŋ aituynşa, özara ıs-qimyldyŋ jaŋa formaty jekelegen bailanystardan jüielı jūmysqa, al keiıngı reaksiiadan aldyn ala oilastyrylǧan, mazmūndy dialogqa köşuge mümkındık beredı.
Öz kezegınde vise-admiral Serık Burambaev qoǧamda Qaruly küşterge qatysty qalyptasqan keibır stereotipterdıŋ älı de saqtalyp otyrǧanyna nazar audaryp, armiia, äskeri qyzmetşıler jäne olardyŋ elge qyzmetı turaly sapaly ärı sūranysqa ie kontent qalyptastyrudyŋ zor äleuetı bar ekenın atap öttı:
— Bügınde ar-namys, boryş, otansüigıştık sekıldı negızgı qūndylyqtardy qoǧamdyq diskursqa qaita engızu asa maŋyzdy. Būl memleket pen media qauymdastyqtyŋ bırlesken küş-jıgerın, Qaruly küşterdıŋ qyzmetın faktılerdı būrmalamai, äsırelemei, adal ärı käsıbi türde jariialaudy talap etedı, — dedı vise-admiral.
Qol qoiylǧan memorandum Qorǧanys ministrlıgınıŋ qyzmetkerlerıne arnalǧan oqytu baǧdarlamalaryn ıske asyrudy, seminarlar, şeberlık sabaqtary, taǧylymdamalar men baspasöz turlaryn ötkızudı közdeidı. Sondai-aq äskeri taqyrypty BAQ-ta jariialaudy jetıldıru jönındegı ūsynymdardy äzırleu, Bas redaktorlar klubynyŋ saraptamalyq keŋesın qalyptastyru jäne onyŋ salalyq media jobalarǧa, onyŋ ışınde «Äsker media» konkursyna qatysuy josparlanǧan.
Kezdesu barysynda media qauymdastyq ökılderı yntymaqtastyqty damytu jönındegı ūsynystaryn bıldırdı. Öz bastamalaryn MNU universitetınıŋ Halyqaralyq jurnalistika mektebınıŋ atynan mediamenedjer Baqyt Şoiynbek ūsyndy.
«Qazaq gazetterı» JŞS bas direktorynyŋ orynbasary Qambar Ahmetov:
— Bızdıŋ basylymdar Qazaqstan Respublikasynyŋ Qaruly küşterımen ūzaq jyldar boiy tyǧyz yntymaqtastyqta jūmys ıstep keledı. Memorandum jüielı jūmysty jolǧa qoiuǧa jäne zamanaui aqparattyq formattardy engızuge negız qalaidy, — dep atap öttı.
«Liter» gazetınıŋ bas redaktory Janna Oişybaeva:
— Bız üşın armiia turaly käsıbi ärı auditoriiaǧa tüsınıktı tılde aitu maŋyzdy. Memorandumǧa qol qoiu aşyq dialogqa jaŋa mümkındıkter aşady, — dedı.
Kezdesu qatysuşylary «Egemen Qazaqstan», «Kazahstanskaia pravda» jäne «Liter» basylymdarynyŋ Qazaqstan Respublikasynyŋ Qaruly küşterımen köp jyldan berı yntymaqtastyq ornatyp kele jatqanyn atap ötıp, aqparattyq özara ıs-qimyldyŋ jaŋa formattaryn damytuǧa daiyn ekendıkterın bıldırdı.
Öŋırlık būqaralyq aqparat qūraldarynyŋ bas redaktorlary da memorandum aiasynda belsendı ärı syndarly yntymaqtastyqqa daiyn ekenın rastady.
