Mäjılıs deputaty Ermūrat Bapi ūlttyq qauıpsızdıktı qamtamasyz etu maqsatynda memlekettık qūpiialarǧa qol jetkızgen būrynǧy joǧary lauazymdy tūlǧalardyŋ şetelge şyǧuyn zaŋnamalyq tūrǧyda retteudı ūsyndy, dep habarlaidy “Adyrna”.
«Būl ne qylǧan sümeŋdegen jürıs?! Kezınde jeke özı bilep-töstep, bır şybyqpen aidaǧan halqy pana bolmaitynyn sezgen soraqynyŋ qorlyǧy ǧana ma?
Älbette būl tılenşektık Qazaqstanǧa, qazaqqa qarailas qareket emes, ädettegıdei toiymsyz jeke bastyŋ qamy bolsa kerek! Sondyqtan eldıŋ qauıpsızdıgın qamtamasyz etu maqsatynda memlekettık qūpiiany bıletın tūlǧanyŋ (eks-prezident bolsyn, ministr nemese basqa da lauazymger bolsyn) şet elge şyǧu mümkındıgın retteitın zaŋ qajet şyǧar. Qalai oilaisyŋdar, zaŋger-deputat ärıptester, bız osyndai zaŋǧa bastamaşylyq jasai alamyz ba?» – dep jazdy ol Facebook paraqşasynda.
Bäpi būl mäselenı Qytaidaǧydai emigrasiiany şekteu tetıkterınıŋ halyqaralyq mındettemeler men memleketaralyq konvensiialarǧa qanşalyqty qaişy keluı mümkın ekenı tūrǧysynan köterıp otyrǧanyn atap öttı. Onyŋ aituynşa, deputattardyŋ özderı de memlekettık qūpiiaǧa qatysty talaptardy saqtauǧa mındettı.
«Būny sızderden erekşe sūrap otyrǧan sebebım - Qytaidaǧy siiaqty şetke şyǧudy şekteitın zaŋ bızdıŋ eldıŋ halyqaralyq mındettemelerı men memleketaralyq konvensiialarǧa qanşalyqty qaişy keluı mümkın? Mäselen, bız deputat retınde mūndai memlekettık qūpiialyq qajettılıkke moiynsūnuǧa mäjbürmız.
Al būǧan jäne Qojamjarov siiaqty basqalarǧa eldıŋ qauıpsızdık qamyna orai künıbūryn şekaralyq "qyzyl jalauşa" qoiuǧa bolmai ma? Būl qabyldaudyŋ saiasi mazmūnyn Kreml qalai qabyldaitynyn qaidam, al eks-prezidenttıŋ ışındegı "qyzyl itı" eldıŋ memlekettık bilıgı men Qazaqstan halqyna ses körsetuı dep tüsınemız be?» – dep tüiındedı deputat.
Eske salaiyq, būǧan deiın Resei prezidentı Vladimir Putin Kremlde Qazaqstannyŋ būrynǧy prezidentı Nūrsūltan Nazarbaevpen kezdesken bolatyn. Aita keteiık, qyzmetınen ketkennen keiın eks-prezident Nazarbaev Putinnıŋ qabyldauynda jiı bolyp tūrady. Al 2025 jyldyŋ basynda Memleket basşysy Qasym-Jomart Toqaev Nazarbaevtyŋ otstavkadan keiın saiasi ädeptılık tanyta bermegenıne nazar audarǧan edı.
