Qaraǧandy oblysynda kölık infraqūrylymyn damytu jūmystary jalǧasuda. 2026 jyly öŋırde respublikalyq jäne oblystyq maŋyzy bar avtojoldardyŋ, sondai-aq qalalyq köşeler men köpırlerdıŋ 500 şaqyrymǧa juyǧyn jaŋartu josparlanyp otyr. Jobalardyŋ negızgı maqsaty – jol qozǧalysy qauıpsızdıgın arttyru jäne oblystyŋ logistikalyq äleuetın damytu.
Negızgı jobalardyŋ bırı Qaraǧandy – Jezqazǧan avtojolyn qaita jaŋǧyrtu bolady. Ūzyndyǧy 122 şaqyrym bolatyn būl magistral eldıŋ ortalyq öŋırlerı üşın strategiialyq maŋyzǧa ie jäne Qaraǧandy oblysyn Ūlytau öŋırımen bailanystyrady. Jol 1970-jyldary salynǧan jäne jarty ǧasyrdan astam uaqyt boiy kürdelı jöndeuden ötpegen.
Joba aiasynda avtojoldy tört jolaqqa deiın keŋeitu qarastyrylǧan. Jūmystar jaŋa täsılmen ūiymdastyrylady: aldymen ekı qosymşa jolaq salynyp, sodan keiın qoldanystaǧy jol tösemıne jöndeu jürgızıledı. Būl täsıl kölık qozǧalysyn toqtatpai, ainalma joldardy ūiymdastyrmai jürgızuge jäne jürgızuşıler üşın qolaisyzdyqtardy barynşa azaituǧa mümkındık beredı.
Jobany qarjylandyru Halyqaralyq qaita qūru jäne damu bankı men Aziia infraqūrylymdyq investisiialar bankı qaryzdary esebınen maqūldanǧan. Qazırgı uaqytta merdıger ūiymdy anyqtau boiynşa konkurstyq räsımder jürgızılude. Avtojoldy qaita jaŋǧyrtu jūmystary biyl bastalyp, 2029 jylǧa deiın aiaqtalady dep josparlanǧan.
Sonymen qatar oblystyq maŋyzy bar avtojoldardyŋ 84 şaqyrymyna ortaşa jöndeu jürgızu közdelıp otyr. Atap aitqanda, Qarqaraly – Egındıbūlaq – Bürkıttı avtojoly jöndeledı.
Öŋırde temırjol infraqūrylymyn jaŋǧyrtu jūmystary da jürgızılude.
Joba «Qazaqstan temır joly» baǧdarlamasy aiasynda ıske asyrylyp, oblysta 14 nysandy qamtidy: 10 vokzal jäne 4 jolauşylar platformasy. Joba şeŋberınde ǧimarattardy, injenerlık jelılerdı, kütu zaldaryn jäne perrondardy jaŋartu, sondai-aq jolauşylarǧa, onyŋ ışınde mümkındıgı şekteulı azamattarǧa qolaily jaǧdai jasau qarastyrylǧan. Qauıpsızdık, navigasiia jäne jailylyq mäselelerıne erekşe nazar audarylady.
Ötken jyldyŋ soŋynda Aisa, Temırtau (Äleumettık qala), Saryşaǧan jäne Qaraǧandy-Sūryptau (jūp) stansiialaryndaǧy jolauşylar platformalaryn jöndeu jūmystary aiaqtaldy. Biyl būl nysandarda şatyrlar men aialdama pavilondary ornatylady. Sonymen qatar Balqaş-2, Moiynty, Aǧadyr, Däriia, Jaryq, Jaŋa Qaraǧandy, Qaraǧandy-Sūryptau (jūp), Myrza, Nūra jäne Sarybel vokzaldarynyŋ ǧimarattaryn jaŋartu jūmystary jalǧasuda. Jobalardy biyl aiaqtau josparlanǧan.
Taǧy bır maŋyzdy infraqūrylymdyq joba azamattyq aviasiiany damytuǧa qatysty. Balqaş qalasynda äuejaidy qaita jaŋǧyrtu jūmystary aiaqtaldy. Onyŋ aiasynda aerodrom infraqūrylymy jaŋartylyp, jabdyqtar modernizasiialandy. 1 mausymnan bastap Astana men Almaty baǧyttaryna subsidiialanatyn äue reisterın ıske qosu josparlanyp otyr. Jalpy, äuejaidyŋ mümkındıgı artyp, köbırek reis qabyldauǧa jaǧdai jasalady. Būl öz kezegınde Balqaş kölınıŋ jaǧalauynda turizm men ıskerlık belsendılıktıŋ damuyna yqpal etedı.
