Äl-Farabi daŋǧylynda bolǧan jol-kölık oqiǧasy jaily video jariialaǧan bloger Ädılethan Moldahan taǧy ekı ai abaqtyda otyratyn boldy. Būǧan deiın ol 10 künge qamauǧa alynǧan bolatyn, dep habarlaidy «Adyrna» tılşısı.
Almaty qalalyq PD mälımetınşe, körıneu jalǧan aqparat taratu deregı boiynşa sotqa deiıngı tergeu amaldaryn jürgızılıp jatyr.
«Aldyn ala tergeu şeŋberınde sot qamauǧa alu türındegı būltartpau şarasyn ekı ai merzımge sanksiialady. Barlyq män-jaidy jan-jaqty, tolyq jäne obektivtı anyqtauǧa baǧyttalǧan qajettı tergeu äreketterı jürgızılude»,– delıngen habarlamada.
Būǧan deiın bloger Almatydaǧy jol apatyna qūqyq qorǧau organy qyzmetkerı qatysqan boluy mümkın dep mälımdegen edı. 30 nauryzda ol "körıneu jalǧan aqparat taratty" degen küdıkpen ūstalyp, on künge qamalǧan edı.
