Foto: Äli Ǧalym
Mäjılıs Spikerı, «AMANAT» Töraǧasy Erlan Qoşanov partiianyŋ Respublikalyq qoǧamdyq qabyldau alaŋynda azamattardy qabyldady. Tūrǧyndar partiia Töraǧasyna su jelılerın jöndeu, eldı mekenderdı gazdandyru jäne şekara maŋyndaǧy audanda poşta qyzmetın jolǧa qoiu syndy bırqatar maŋyzdy mäselemen jügındı.
Qoǧamdyq qabyldauǧa kelgen Ūlytau oblysy Jaŋaarqa audanynyŋ tūrǧyny Beibıt Qasenov su jelılerın jöndeuge respublikalyq biudjetten qarajat bölu mäselesın qozǧady.
«Audan ortalyǧyndaǧy su jelılerınıŋ jöndeu körmegenıne 30 jyldyŋ jüzı boldy. Bügınde infraqūrylymdyq jüienıŋ 60-70 paiyzy tozyǧy jetıp tūr. Sonyŋ saldarynan tūrǧyndardy sapaly auyz sumen tūraqty qamtamasyz etuge qatysty kürdelı mäsele tuyndap otyr. Al jergılıktı biudjetten qarajat böluge mümkındık joq», – dedı ol.
Erlan Qoşanov Memleket basşysy halyqty taza auyz sumen qamtamasyz etu airyqşa maŋyzdy mındet ekenın atap ötkenın jäne soŋǧy jyldary osy baǧytta naqty şaralar qabyldanǧanyn eske saldy. Sondai-aq partiianyŋ «Halyqpen bırge!» sailaualdy baǧdarlamasy aiasynda barlyq tūrmystyq jäne äleumettık infraqūrylym auyl tūrǧyndary üşın qoljetımdı boluy, auyldar taza auyzsumen qamtamasyz etıluı maqsatynda auqymdy jūmys atqaryluda. Būl rette, partiia Töraǧasy Beibıt Qasenovtyŋ ötınışı partiianyŋ auyl tūrǧyndaryna jaily jaǧdai jasau baǧytynda qolǧa alyp jatqan jūmysynda, zaŋ şyǧaru ısınde jäne özge de qyzmetınde eskerıletının atap öttı.
Al Astana qalasynda tūryp jatqan Madi Seitmanov, Äzıret Myrzaqasym, Janerke Jasūzaq jäne Sūltan Batyrbek esımdı jas azamattar qoǧamdyq tamaqtanu ornynda jūmys ıstegenderın, alaida jūmys beruşı jalaqylaryn bermei ketkenın aityp, şaǧymdandy. Erlan Qoşanovtyŋ aituynşa, zaŋnamaǧa säikes, jūmys beruşı qyzmetkermen mındettı türde eŋbek şartyn jasasuǧa tiıs. Odan jaltaruǧa jol beruge bolmaidy. Sondyqtan partiia jastardy jūmysqa ornalastyru mäselesıne jıtı män beredı. Mäselen, partiianyŋ «Jastar Ruhy» jastar qanaty kolledj jäne joǧary oqu oryn tülekterıne arnalǧan auqymdy bos jūmys oryndary järmeŋkesın ötkızıp keledı.
«Memleket basşysy Qasym-Jomart Toqaev adal eŋbek qaşan da baǧalanuǧa, qorǧaluǧa jäne laiyqty qarjylandyryluǧa tiıs ekenın ünemı aityp keledı. Bügınde elımız Progressivtı ärı Ädılettı Qazaqstandy qūru jolyna tüstı. Referendumda azamattar keŋınen qoldaǧan jaŋa Konstitusiiaǧa säikes, är adamnyŋ eŋbek etuge, qyzmet pen käsıp türın erkın taŋdauǧa qūqyǧy bar. Qazaqstan Respublikasy azamattardyŋ äleumettik tūrǧyda qorǧalu qūqyǧyna zaŋǧa säikes kepıldık beredı. Al Mäjılıs qabyrǧasyndaǧy partiiamyzdyŋ fraksiia deputattary azamattardyŋ eŋbek qūqyǧynyŋ qorǧaluyna qatysty zaŋnamalarǧa tiıstı özgerıster engızu jūmysyn küşeitedı», – dedı Erlan Qoşanov.
Astana qalasynyŋ tūrǧyny Gülmira Majenova esırtkı ainalymy üşın sottalǧan adamdarǧa qatysty qylmystyq saiasatty jetıldırudı jäne zaŋnamany ızgılendırudı ūsyndy. Sonymen qatar Jambyl oblysy Jualy audany Jaŋatalap auylynyŋ tūrǧyny Serık Qojaǧūlov telefon jäne internet bailanysy sapasyn jaqsartudy sūrady. Al Bauyrjan Jauǧaşarov Şyǧys Qazaqstan oblysy Marqaköl audanynda poşta qyzmetın jolǧa qoiu mäselesıne nazar audardy. Erekşe qajettılıgı bar balalar tärbielep otyrǧan Gülbahram Erǧalimova jeŋıldıkpen avtokölık satyp aluǧa kömek körsetudı ötındı. Öz kezegınde, İvan Markşteder esımdı azamat elektr quatyn esepke alu qūraldaryn ornatu tärtıbıne qatysty ūsynysyn jetkızdı. 
Sondai-aq azamattar erekşe qajettılıgı bar balalardy oŋaltu jäne damytu ortalyǧyna qoldau körsetuge, arnaiy bılım beru ūiymdary pedagogtarynyŋ jalaqysyna, oquşylar saraiyn, temırjol arqyly ötetın jerüstı jaiau jürgınşıler köpırın salu saluǧa qatysty bırqatar mäsele köterdı. Öz kezegınde, Partiia Töraǧasy bügın köterılgen mäselenıŋ bärı jüielı türde şeşıletının aitty.
Erlan Qoşanov azamattarmen kerı bailanys ornatuda osyndai qabyldaular ötkızudıŋ maŋyzyna toqtalyp, «AMANAT» partiiasy aldaǧy uaqytta da halyqtyŋ mūŋ-mūqtajyn şeşuge basa män beretının atap öttı.
«Bız el-eldı köp aralaimyz. Halyqtyŋ jaǧdaiyn, talap-tılegın jaqsy bılemız. Sailaualdy baǧdarlamamyzda olardyŋ bärı qamtylǧan. Barlyǧy kezeŋ-kezeŋımen ıske asyp jatyr. Bıraq öŋırlerdı aralau bır bölek, azamattarmen betpe-bet kezdesıp, mūŋ-mūqtajyn da tyŋdauymyz kerek. Bız üşın är adamnyŋ mäselesı maŋyzdy. Ony şeşu – basty mındetımız. Byltyr «AMANAT» partiiasynyŋ qoǧamdyq qabyldauyna azamattardan 124 myŋ ötınış kelıp tüstı. Olardyŋ basym bölıgı şeşıldı. Memleket basşysynyŋ «Halyq ünıne qūlaq asatyn memleket» tūjyrymdamasy, halyq ünıne qūlaq asatyn partiia degenımız osy», – dedı partiia töraǧasy.
Qabyldau qorytyndysy boiynşa Erlan Qoşanov azamattardy tolǧandyrǧan barlyq mäselenı jeke baqylauyna aldy.
