Qazaqstanda geologııalyq barlaý salasyna qarjy tym az bólinedi. Bul týraly Ónerkásip jáne qurylys mınıstrligi Geologııa komıtetiniń tóraǵasy Erlan Aqbarov málimdedi, dep habarlaıdy «Adyrna» tilshisi kapital.kz-ke silteme jasap.
Onyń aıtýynsha, elimizde paıdaly qazba qorlary sarqylyp, ken oryndary taýsylyp jatyr. Sondyqtan geologııalyq barlaý jumystaryn jandandyrý qajet.
«Ókinishke qaraı, geologııalyq barlaýdy qarjylandyrýy tómen deńgeıdegi elder qataryna jatamyz. Qazaqstanda qazir bir sharshy shaqyrymdy qarjylandyrý 8 dollardy quraıdy. Máselen, Reseıde bul kórsetkish 25 dollar, Ózbekstanda 98 dollar bolyp otyr», - dedi Erlan Aqbarov.
Tóraǵa geologııalyq barlaýdy jedeldetý kerek ekenin aıtyp, bul salaǵa ınvestıııany arttyrý qajettigin túsindirdi.
«Geologııalyq barlaýdy jedeldetý kerek. Bir ókinishtisi, ekonomıkamyzdyń negizin qalaýǵa, geologııalyq salaǵa, jalpy mıneraldyq-shıkizat keshenin damytýǵa tym az kóńil bólinýde. Investıııa kóleminiń ulǵaıýy baıqalmaǵanyn basa aıtýymyz tıis»,—dep tolyqtyrdy ol.
