Tabysy, dáýleti, baılyǵy boıynsha Qazaqstanda 12-orynda turǵan kásipker Nurlan Smaǵulov zeınetaqy qoryndaǵy aqshasyn sheship alyp, kádege jaratatynyn aıtty.
Alaıda onyń zeınetaqy qorynda qansha aqshasy bar? Almatyda ótken baspasóz máslıhatynda Nurlan Smaǵulov zeınetaqy qoryndaǵy qarjysynyń qansha ekenin bilmeıtinin aıtty.
–Jaǵdaıym jaqsy. Úıim bar. Maǵan qosymsha páterdiń keregi joq. Biraq zeınetaqy qorymdaǵy aqshanyń kólemi óte úlken dep shamalaımyn, – dedi Nurlan Smaǵulov jýrnalısterge bergen saýalynda.
Biraq qordan aqshasyn alǵysy kelip otyrǵan kásipker ony qaıda jaratady?
Qazaqstanda ata-anasyz jetim qalǵan balalar barshylyq. Aıta ketý kerek, Smaǵulov «Qazaqstannyń balalar derevnııasy» qamqorshylar keńesiniń múshesi ekeni belgili.
–Jalpy qamqorlyqsyz qalǵan balalar memleketten tezirek úı alýy tıis. Alaıda bul jeńildik júzege asa bermeıdi. Jetim balalar ár jerde jumys isteıdi, páter jaldap turýǵa jaǵdaıy kele bermeıdi. Sondyqtan biz «Qazaqstannyń balalar derevnııasyn» qurdyq. Ázirge Almaty qalasynda osyndaı eki úı bar. Bizdiń kompanııa qamqorlyqsyz qalǵan balalarǵa kómektesedi, olardy jumysqa ornalastyrady. Birqatar balalar bizde jumys isteıdi jáne balalar derevnııasynda turyp, jańa mamandyqtardy ıgeredi. Olardyń alańsyz ómir súrýi úshin men zeınetaqy qoryndaǵy aqshamnyń biraz bóligin «Qazaqstannyń balalar derevnııasy» qoryna aýdaramyn. Balalar úıinen kelgen baspanasyz jasóspirimder bizdiń páterlerde turatyn bolady. Men sondyqtan da zeınetaqy qoryndaǵy qarjymdy olar muqtajdyq kórmes úshin qorǵa aýdaramyn,-dedi kásipker Nurlan Smaǵulov.
Eskerte keteıik, elimizdegi birqatar saýda úıi men tanymal kompanııanyń ıesi Nurlan Smaǵulovtyń qazynaǵa tóleıtin salyǵy da qomaqty. Derekke júginer bolsaq, 2020 jyly onyń Astana Motors kompanııasy bıýdjetke 29,4 mlrd tenge salyq tólegen. Al jurtshylyq kóp baratyn MEGA saýda úıi bıyl pandemııaǵa baılanysty 140 kún jabyq bolyp, 13 mıllıard teńge shyǵynǵa ushyrady.
Erkin QALDAN,
«Adyrna» ulttyq portaly
