Foto: AFP VIA GETTY IMAGES
24 mausym künı Venesuelada bolǧan ekı joiqyn jer sılkınısınıŋ saldarynan kemınde 1430 adam qaza tapty. Būl turaly eldıŋ Ūlttyq assambleiasynyŋ töraǧasy Horhe Rodriges mälımdedı, dep habarlaidy “Adyrna”.
Bilık mälımetınşe, 3360 adam türlı därejede jaraqat alǧan. Al BŪŪ-nyŋ baǧalauynşa, 50 myŋnan astam adam älı künge deiın ız-tüzsız joǧalǧandar qatarynda.
Horhe Rodriges būl jer sılkınısterın «Venesuelanyŋ soŋǧy 123 jyldaǧy eŋ auyr apaty» dep atady. Onyŋ aituynşa, qazırgı uaqytta 3142 otbasy uaqytşa baspanalarǧa ornalastyrylǧan.
Sondai-aq ol särsenbı küngı ekı negızgı jer sılkınısınen keiın 430 afterşok tırkelgenın habarlady.
Rodriges tūrǧyndardy üilerınde qalyp, eŋ köp zardap şekken La-Guaira ştatyna barmauǧa şaqyrdy. Onyŋ aituynşa, būl öŋırde qirau kölemı öte ülken.
Därıgerlerdıŋ mälımetınşe, auruhanalar mümkındıgınıŋ şegınde jūmys ıstep jatyr. BBC-ge sūhbat bergen medisina qyzmetkerlerı jer sılkınısıne deiın-aq Venesuelanyŋ densaulyq saqtau jüiesınde därı-därmek pen medisinalyq qūraldardyŋ tapşylyǧy bolǧanyn aitty.
Jūma künı Venesuelanyŋ uaqytşa prezidentı Delsi Rodriges La-Guaira ştatyn qūtqaru jūmystaryn üilestıru maqsatynda äskeri basqaruǧa beru turaly şeşım qabyldady.
BŪŪ mälımetınşe, ızdestıru-qūtqaru jūmystaryna myŋnan astam halyqaralyq maman jūmyldyrylǧan. Olardyŋ qatarynda ız kesetın itterı bar kinologiialyq toptar da bar.
BŪŪ Bas hatşysynyŋ gumanitarlyq mäseleler jönındegı orynbasary ärı tötenşe kömek üilestıruşısı Tom Fletcher BBC radiosyna bergen sūhbatynda:
«Venesuela halqyna aitarym – halyqaralyq kömek jolda», – dedı.
Apat eldegı onsyz da kürdelı saiasi daǧdarys kezınde boldy. Būrynǧy prezident Nikolas Maduro AQŞ äskeri küşterı jürgızgen Karakastaǧy operasiia barysynda ūstalǧanyna alty aiǧa da tolmaǧan.
Aita ketsek, AQŞ Geologiialyq qyzmetınıŋ (USGS) mälımetınşe, alǧaşqy jer sılkınısı jergılıktı uaqytpen särsenbı künı saǧat 18:04-te tırkelgen. Ekınşı jerasty dümpuı bır minutqa jetpeitın uaqyttan keiın bolǧan.
USGS ekınşı jer sılkınısı 1900 jyldan bergı eŋ quatty jer sılkınısı bolǧanyn habarlady. Osydan keiın elde 214 afterşok tırkelgen.
«Būl bızdıŋ aumaqtaǧy seismikalyq belsendılıktıŋ öte joǧary ekenın körsetedı», – dedı Delsi Rodriges.
Delsi Rodrigestıŋ aituynşa, qūtqaruşylar üiındı astynan ondaǧan adamdy tırıdei alyp şyqqan.
«Olardyŋ qaitadan otbasy men jaqyndaryn qūşaqtap jatqanyn köru – bız üşın ülken quanyş», – dedı ol.
Sonymen qatar La-Guaira ştaty tötenşe jaǧdaidyŋ saldaryn joiu jäne qūtqaru jūmystaryn üilestıru üşın äskeri baqylauǧa berılgenı jariialandy.
La-Guaira – Venesuelanyŋ eŋ köp zardap şekken öŋırlerınıŋ bırı ärı el ekonomikasy üşın strategiialyq maŋyzy bar aimaq. Ol Karib teŋızınıŋ jaǧalauynda, Karakas qalasynyŋ soltüstıgınde ornalasqan jäne astana tūrǧyndarynyŋ tanymal demalys orny sanalady.
Būl jerde Venesuelanyŋ ekı ırı teŋız portynyŋ bırı men Maiketiiadaǧy Simon Bolivar atyndaǧy halyqaralyq äuejai ornalasqan.
1999 jyly däl osy öŋırde joiqyn köşkınder bolyp, myŋdaǧan adam qaza tapqan edı. Sol apattan keiın La-Guaira tolyq qalpyna kele alǧan joq.
Memlekettık telearnanyŋ habarlauynşa, jūma künı taŋerteŋ Şveisariiadan 80 qūtqaruşy men 18 tonna gumanitarlyq jük jetkızıldı. Top qūramynda ızdestıru itterı bar kinologtar da bar.
Şveisariia jer sılkınısınen keiın şūǧyl kömek ūsynǧan alǧaşqy memleketterdıŋ bırı boldy.
Sondai-aq Venesuela bilıgı Meksika men Latyn Amerikasynyŋ basqa elderınen de qūtqaruşylar men gumanitarlyq kömek kelgenın habarlady.
AQŞ-tyŋ Oŋtüstık qolbasşylyǧy kömek körsetu jūmystaryn üilestıru üşın joǧary lauazymdy äskeri ökıldıŋ Venesuelaǧa barǧanyn mälımdedı.
Izdestıru-qūtqaru jūmystaryna alǧaşqylardyŋ bırı bolyp İspaniia mamandary qosyldy.
Europalyq komissiia töraǧasy Ursula fon der Liaiennıŋ aituynşa, İtaliia, Chehiia, Fransiia, Germaniia, Liuksemburg, Portugaliia jäne Niderland ta ızdestıru-qūtqaru toptaryn jıberıp jatyr.
