Astanadaǧy Qalibek Quanyşbaev atyndaǧy Qazaq ūlttyq muzykalyq drama teatrynda Äbdıjämıl Nūrpeiısovtıŋ äigılı «Qan men ter» trilogiiasy jelısı boiynşa sahnalanǧan jaŋa qoiylymnyŋ premerasy öttı.
Ūlttyq teatrdyŋ 35-mausymyn qorytyndylaǧan aituly mädeni oqiǧaǧa ziialy qauym ökılderı men teatrsüier körermen köp jinaldy.
Premera qarsaŋynda ötken baspasöz brifingınde spektakldıŋ şyǧarmaşylyq tūjyrymdamasy tanystyrylyp, teatrdyŋ 35 jyldyq mereitoiyna arnalǧan josparlar jariia etıldı.
Brifing barysynda akter Bolat Ybyraev qoiylymnyŋ qazaq teatryndaǧy tarihi maŋyzyna toqtaldy. Onyŋ aituynşa, «Qan men ter» – qazaq halqynyŋ taǧdyryn, Aral öŋırınıŋ qasıretın, adam men qoǧamnyŋ kürdelı kezeŋderın tereŋ beineleitın şyǧarma.
"Būl – tek bır adamnyŋ emes, tūtas halyqtyŋ taǧdyry. «Qan men ter» bügın de özektılıgın joǧaltqan joq. Bır spektakldı köru keide bır kıtap oqumen teŋ. Körermen ekı saǧattyŋ ışınde sol däuırdıŋ oqiǧasyn, keiıpkerlerdıŋ taǧdyryn sezınıp, tereŋ oi tüiedı", – dedı Bolat Ybyraev.
Qoiylymdy Qazaqstannyŋ eŋbek sıŋırgen qairatkerı Nūrlan Jūmaniiazov sahnalaǧan. İnssenirovka avtory – Qazaqstannyŋ Halyq ärtısı Tılektes Meiramov. Spektakldıŋ ssenografiiasy men kostiumderın Qanat Maqsūtov äzırlese, muzykalyq körkemdeuın Qairat Amangeldıūly, horeografiiasyn Asan Boronchinov, jaryq şeşımın Azamat Bekbembetov jasaǧan.
Premerany tamaşalaǧan körermen qatarynda qazaq ädebietı men mädenietınıŋ körnektı ökılderı Tölen Äbdık pen Roza Mūqanova boldy.
Almaty qalasynan arnaiy kelgen Aiman esımdı körermen qoiylymnan erekşe äser alǧanyn aitty.
"Sahnanyŋ bezendırıluıne erekşe män berdım, öte joǧary deŋgeide jasalǧan. Būl şyǧarmany aldymen oqyp, keiın qoiylymyn körgen dūrys eken. Spektakl köŋılımnen şyqty", – dedı ol.
Kezınde Qazaqstannyŋ Eŋbek Erı, KSRO jäne Qazaqstannyŋ Halyq ärtısı Äzerbaijan Mämbetov sahnalaǧan «Qan men ter» araǧa jyldar salyp jaŋa rejisserlık şeşımmen qaita jaŋǧyryp, bügıngı körermenmen qaita qauyşty.
