Bıyl naýryzda Almatydaǵy Ǵabıt Músirepov atyndaǵy Qazaq memlekettik akademııalyq balalar men jasóspirimder teatrynda premerasy bolǵan «Bolmaǵan balalyq shaq» qoıylymy az ýaqyttyń ishinde óz kórermenin taba bildi. Farhat Moldaǵalıdiń rejısserligimen sahnalanǵan spektakl Aqberen Elgezektiń «Bolmaǵan balalyq shaq» povesiniń jelisinde jasalǵan.
Kórermenge oı salar qoıylymnyń akterlik quramyna tájirıbeli ártister jınaqtalǵan. Basty keıipker Aqoshtyń rólin – Jaqsylyq Turlyǵazy, Narıman Elýbaı jáne Nurserik Keńesbaev oınasa, anasynyń rólin elge tanymal Nurgúl Mańǵytova men Aqmaral Daırabaeva somdaıdy. Al ápkesi Marjannyń rólin halyqtyń júregine jetkizip oınaǵan aktrısalar – Dınara Nurbolat pen Móldir Qonysqyzy.
Kópshiliktiń kózaıymyna aınalǵan qoıylymmen oqyrmandy tereńirek tanystyrý maqsatynda Marjannyń rólin somdaıtyn talantty aktrısa Dınara Nurbolatpen suqbattasqan bolatynbyz.
- Senarıımen tanysqan kezdegi eń alǵashqy áserińiz qandaı boldy?
- Eń birinshi bizde senarıı bolǵan joq. Qyzyǵy, bizdiń qolymyzda kitap boldy. Farhat Moldaǵalı kózimizshe pesa jasady. Barlyǵymyzdyń basymyzdy qosyp, kitapty oqyp, sosyn osy jerlerin alsaq qalaı bolady dep bizdi jınaqtap alyp keldi. Farhattyń keremet jumys jasaıtyny osydan shyǵar. Biz birden kitapty oqyǵan soń, ózime qatty áser etti. Kitapty oqyǵan kezde árıne eń birinshi aýyl esime tústi. Dál ózimniń aýylymda bolyp jatqan oqıǵa sııaqty boldy. Sebebi, mundaı jaǵdaı meniń otbasymnyń basynan ótpese de, jaqyn týysqanymnyń basynan ótken edi. Sondyqtan maǵan qatty áser etti. Kózime jas almaı oqı almadym. Biraq, kóp jerlerinde kúlip te otyrdym.
Qoıylym kezinde qatty áser etken jeri Aqoshtyń ákesin «áke sen asqar taý, men onyń kishkentaı jotasymyn. Áke sen ózen, men seniń bir tamshyńmyn» dep eske alyp aıqaılaıtyn jeri. Bul jerdiń utymdy shyǵýynyń sebebi Farhat Moldaǵalı ákesine degen bar mahabbatyn sol jerde aıtqysy keldi. Kishkentaı ǵana dúnıe bolsa da, ákesine degen júregindegi saǵynyshyn osy sahna arqyly jetkize aldy.
- Keıipkerińizdi ashý úshin qandaı daıyndyq jumystaryn jasadyńyz?
- Daıyndyq árkezde ártúrli bolady. Osy qoıylymda avtordyń ózi shaqyrtylǵany paıdasyn tıgizdi. Aqberen aǵanyń ózi kelip ápkesiniń qandaı bolǵanyn aıtyp berdi, aıtqandarynan alǵan jerler de boldy. Marjannyń jarqyn, ádemi keıipker bolyp qalǵanyn qalaǵandyqtan, keıbir qylyqtaryn ózimiz de qostyq. Keıin sodan obraz jasap shyǵardym. Keıbir aktrısalar adamnyń syrtqy kelbetine, júris-turysyna mán berip, sonymen baılanysty jumys jasaıdy, biraq, men ózim rólge kelgen kezde ishki jan dúnıesimen jumys jasaımyn.
Alaıda, sen qansha jerden jaqsylap daıyndalyp kelseń de, janyńdaǵy serigińmen túsinise almasań, barlyǵy qalyp qoıady. Seriktesiń jaqsy bolsa ról kúshti shyǵady. «Partner qudaıdyń bergen baqyty» dep jatady, shynymen, osy sózben kelisemin, serigiń jaqsy bolsa ol bir baqyt. Bizdiń teatrda da jaqsy oınaıtyn ártister jetkilikti. Men qazir bir-ekeýin aıtsam, keıbireýleri renjip qalýy múmkin.
- Marjannyń rólinde sizge oınaýǵa ońaı bolǵan sahna boldy ma? Sol týraly aıtyp berseńiz.
- Ońaı dep te aıtýǵa kelmes, biraq, eń shynaıy oınaǵan jerim boldy. Qazir aıtaıyn dep otyrǵannyń ózinde kózime jas keledi. Sebebi, men de 2 jyl buryn anamnan aıyrylyp qaldym. Anasymen Aqoshtyń sahnasy bar, sol jer meniń kóz aldyma anam elestep, ózdigimnen egilip oınaıtyn sahnam. Dál inim ekeýmizdiń anamyzdy eske alyp, muńaıyp jylaıtyn kórinisimiz.
- Sizge keıipkerińiz Marjannyń boıyndaǵy qaı qasıeti unaıdy?
- Inisi úshin jany ashyp, qamqor bolyp turatyn qasıeti. Sebebi, ózińiz kórseńiz toı bolyp jatatyn sahna bar. Anasy kúıeýge shyǵyp jatqanda Aqosh jalǵyz ózi buryshta jylap otyrady. Sol ýaqytta inisiniń kóńilin qımaı «jylamashy Aqosh, bizdiń bolashaq papamyz óte baı, bizge bárin alyp beredi» dep ótirik aıtsa da jubatyp, jany ashyp turatyn jeri men úshin eń jaqsy qasıeti. Biraq, ondaı qasıet qazaqtyń ár qyzynyń boıynda bar qasıet dep oılaımyn.
- Marjannyń rólin óz oıyńyzdaǵydaı alyp shyqtym dep oılaısyz ba?
- Bilmeımin. Shynymdy aıtsam halyqtyń júregine Móldir Qonysqyzy jetkize aldy dep oılaımyn. Sebebi, ol ana ǵoı, kózinde meıirimdilik turady. Onyń ústine túrinen qazaqı ıis ańqyp turady. Meniń obrazymdaǵy Marjan bólek te, Móldir Qonysqyzynyń Marjany bólek. Maǵan sol qyzdyń oınaǵany kóbirek unaıdy.
- Shyǵarmanyń ómirden alynǵany belgili. Degenmen de, jazý múmkindigi sizde bolsa qaı tustaryn ózgerter edińiz?
- Sońynda jumbaq qylyp qaldyrmaı anasymen tabystyrar edim. Anasyn keshirgenin qalaımyn. Aqberen aǵamen suqbat kezinde «júregimniń túbinde keshirgen sııaqtymyn sonymen kúrestim, biraq ol bolmaǵan sııaqty» degen ókinishin uqtym. Sol sebepten men ózgertetin bolsam anasyn qansha degenmende jaqsy kórgizip, ekeýin eseıgende qaýyshtyrar edim.
- Qanshama rólderdi somdap júrsiz. Solardyń ishindegi sizge eń jaqyn keıipker dep kimdi aıtýshy edińiz?
- «Mahabbat qyzyq mol jyldardaǵy» - Záıkúl. Biraq men ol keıipker sııaqty emespin. Soǵan qaramastan kópshiligi uqsatyp ta jatady. Osy obrazym ózime qatty unaıdy. Záıkúldiń róli maǵan qyzyq jaǵdaımen keldi. Bul ról basynda mende emes, qurbym Araılym Myrzahanda boldy. Ol qazir teatrdan shyǵyp, kolledjde sabaq beredi. Ekinshi quramda Gúlnazym Marken degen qyz oınaǵan edi. Ol qazir Túrkııada mamandyǵymen jumys jasaıdy. Solar ketken soń Záıkúldiń róli maǵan qaldy.
- Qazirgi tańda teatrdan bólek qandaı jumystarmen aınalysyp júrsiz?
- Teatrdan bólek eki óner ortalyǵynda sabaq beremin. Jeke ózimniń alty oqýshym bar. Túrli konkýrstarǵa, túsirilimderge aparyp otyramyn. Ustazymnan ne kórsem, oqýshylaryma sony jasaýǵa tyrysamyn. Jalpy men ustazdan baǵym janǵan adammyn. Ashat Maemırov – meniń aǵaıym. Meniń ustazyma jetetin ustaz joq. Ol kisi týraly aıtsam, men qazir toqtaı almaı qalamyn. Ár shákirti úshin ýaıymdaıtyn ondaı adam joq. Bolashaqta sol kisiler sekildi óner akademııasynda sabaq bergim keledi. Alaıda, qazirgi tańda tájirıbem jetedi dep oılamaımyn. Bıyldan bastap kollejde sabaq bersem be degen oıym da bar. Jańa aıtyp ketkenimdeı biraq áli bilim deńgeıim jetińkiremeıdi. Búgingi kúni sahnaǵa shyǵyp oınap kórmegen adamdar sabaq berip júr ǵoı, bul óner akademııasynyń deńgeıin qurtady dep sanaımyn. Ondaı bolmas úshin suryptap otyrý kerek shyǵar. Odan bólek, buıyrsa bıyldan qalmaı óz ortalyǵymdy ashqym keledi.
Sonymen qatar teatrdan basqa kınoǵa túsemin. Biraq, kez kelgenine túse bermeımin, kınony da tańdaıdy ekenmin. Qazir kóp usynystar keledi. Keıipkerimniń sózderi unamaı qalsa, kirispeımin. Mátinge kóp mán beremin. Ózime kınoda unaıtyn rólim – «Kúıeý bala» telehıkaıasyndaǵy Jaınanyń róli, «Qara tańbada» Tolqynnyń obrazy. Ózim sııaqty ashyq-jarqyn bolǵan soń osy rólderim unaıdy.
- Teatrda burynnan beri oınap kele jatyrsyz. Sońǵy 3-4 jylda teatrǵa degen suranys burynǵyǵa qaraǵanda artqan. Sol sizderge sezile me?
- Árıne, baıqalady. Ár qoılymnyń sońynda kelip, alǵysyn bildiretin kórermenderimniń sany artqan. Sapaly kórermender kóbeıgen. Onyń sebebi úzdik spektakl shyǵarýdan dep oılaımyn. Osydan eki jyl buryn teatrdan ketemin degenmin. Ol kezde Farhat Moldaǵalıdiń «Mahabbat qyzyq mol jyldardy» endi shyǵaryp jatqan kezi edi. Sol ýaqytta Farhatpen sóıleskende «qazir osyndaı jaqsy rejısserlar turǵan kezde, men de teatrda júrýim kerek» degen oı paıda boldy. Bul jerde men úshin mańyzdysy jaqsy qoıylymnyń shyǵýyna atsalysý boldy. Sol sebepten men qaldym.
- Qazir teatrǵa qyzyǵatyn jastar jetkilikti. Artyńyzdan ilesip kele jatqan sondaı jastarǵa qandaı keńes beresiz?
- Teatrdy súıseńiz, alǵa basa berińiz. Baı bolamyn, aqsha tabamyn degen oımen kelmeńiz. Ol jerde aqsha joq. Jáı ǵana teatrdy essiz súıý kerek. Alla bergen darynmen jumys jasaý qajet. Bir paıyz talant, qalǵanynyń bári eńbek ekenin esten shyǵarmaı talmaı jumys jasasań barlyǵy ózi keledi.
- Ýaqyt bólip suqbattasqanyńyzǵa alǵys bildiremin!
Mereı Myrzaǵalıqyzy,
Ál-Farabı atyndaǵy QazUÝ jýrnalıstıka fakýltetiniń 2 kýrs stýdenti
