Bügın, 2 şılde – Qazaqstan halyq jazuşysy, aqyn ärı qoǧam qairatkerı Mūhtar Şahanovtyŋ tuǧan künı, dep habarlaidy «Adyrna» tılşısı.
Ol 1942 jyly 2 şıldede Türkıstan oblysy, Töle bi audanyndaǧy Qasqasu auylynda düniege kelgen. Jetı jyldyq mekteptı bıtırgen soŋ traktordyŋ tırkeuşısı, oblystyq «Oŋtüstık Qazaqstan» gazetınde korrektor, ädebi qyzmetker, «Leninşıl jas» gazetınde oŋtüstık oblystar boiynşa menşıktı tılşı, Qazaqstan Jazuşylar odaǧy basqarmasynyŋ hatşysy, respublikalyq «Jalyn» jurnalynyŋ bas redaktory, t.b. qyzmetter atqarǧan. KSRO halyq deputaty, KSRO Joǧarǧy Keŋesınıŋ müşesı, QR Halyq deputaty bolǧan.
Alǧaşqy öleŋder jinaǧy 24 jasynda jaryq körgen. Onyŋ «Örkeniettıŋ adasuy», «Jazager jady kosmoformulasy» (Şyŋǧys hannyŋ pendelık qūpiiasy) atty romandary IýNESKO şeŋberınde qaraldy.
Şahanov 1993-2003 jyldary Qazaqstan Respublikasynyŋ Qyrǧyz respublikasyndaǧy Tötenşe jäne Ökılettı Elşısı qyzmetın atqarǧan. 2003-2004 jyldary «Jalyn» jurnalynyŋ bas redaktory, älem oişyldarynyŋ basyn bırıktıretın «HHI ǧasyr jäne Ruhaniiat» atty halyqaralyq elita klubynyŋ prezidentı, 2004 jyly QR Parlamentı Mäjılısınıŋ deputaty bolǧan. Köptegen öleŋ kıtaby jäne halyq arasyna keŋ taraǧan bırqatar ännıŋ avtory.
1986 jylǧy Jeltoqsan köterılısıne tıkelei qatysuşy bolmasa da, Mūhtar Şahanov oqiǧanyŋ şyndyǧyn aşuda basty röl atqardy. 1989 jyly KSRO Halyq deputattarynyŋ I sezınde (Mäskeu) Jeltoqsan oqiǧasyn alǧaş ret odaqtyq deŋgeide köterıp, resmi «ūltşyldyq» degen baǧany joqqa şyǧarǧan edı. Onyŋ bastamasymen Qazaqstanda Jeltoqsan oqiǧasyn zertteu komissiiasy qūrylyp, Şahanov onyŋ töraǧasy boldy. Komissiia qūpiia qūjattardy aşyp, 8 myŋnan astam adamnyŋ ūstalǧanyn, 90-nan astamynyŋ sottalǧanyn däleldedı. Būl Jeltoqsan qūrbandarynyŋ aqtaluyna negız boldy.
Aibyndy aqyn 20 säuırge qaraǧan tünı 84 jasqa qaraǧan şaǧynda ömırden ozǧan edı. Ūlt janaşyry tuǧan jerı Türkıstan oblysy, Otyrar audanyndaǧy Arystan bab kesenesınıŋ maŋyndaǧy auylǧa jerlendı.
