Darknette 15 million qazaqstandyqtyŋ jeke mälımetterı qamtylǧan derekter bazasy satylymǧa qoiyldy. Būl el halqynyŋ şamamen törtten üşın qūraidy, dep habarlaidy «Adyrna» tılşısı Mash-qa sılteme jasap.
Satuşy atalǧan aqparatty eGov memlekettık servisın būzu arqyly alǧanyn mälımdegen.
Shymzz13 laqap atymen tırkelgen qoldanuşy bazany 0,5 bitkoinǧa, iaǧni şamamen 32 myŋ AQŞ dollaryna baǧalaǧan. Kölemı 2,7 gigabait bolatyn mūraǧatta 47 million jol aqparat saqtalǧan. Onyŋ ışınde jeke kuälık derekterı, telefon nömırlerı, elektrondyq poşta mekenjailary, jūmys oryndary, qūjattardyŋ skan-köşırmelerı jäne qūpiiasözder bar.
eGov platformasynda būǧan deiın de türlı aqaular tırkelgen. Tamyz aiynyŋ basynda keibır paidalanuǧa özge azamattardyŋ jeke paraqşalary aşylǧan bolatyn. Al köktemde qazaqstandyq qarjyger portal arqyly kompaniiany tırkegennen keiın bırneşe saǧat ötpei jatyp jarnamalyq qoŋyraular ala bastaǧanyn aitqan.
Mausym aiynda Jetısu oblysynda 16 millionǧa juyq qazaqstandyqtyŋ jeke derekterı saqtalǧan baza tärkılengen edı. Tergeu mälımetınşe, kollektorlyq agenttık qyzmetkerlerı azamattardyŋ JSN-ı, telefon nömırlerı men tūrǧylyqty mekenjailary turaly aqparatty zaŋsyz paidalanǧan.
Kiberqauıpsızdık salasynyŋ mamandary būl derekter bazasyn alaiaqtyqpen ainalysatyn koll-ortalyqtar satyp aluy mümkın dep alaŋdaidy. Būǧan deiın alaiaqtar Qazaqstandy Reseimen şatastyryp, Pavlodardaǧy zeinetkerlerdı aldap, bank ǧimaratynda jarylys jasauǧa itermelegen edı.
Ükımettıŋ eseptık otyrysynda Premer-ministrdıŋ orynbasary – jasandy intellekt jäne sifrlyq damu ministrı Jaslan Mädiev eGov 3.0 portalynyŋ jaŋartylǧan nūsqasy ıske qosylǧanyn habarlaǧan. Onyŋ aituynşa, jyl soŋyna deiın memlekettık qyzmetterdıŋ şamamen 70 paiyzy eGov GPT intellektualdy kömekşısı arqyly qoljetımdı bolady.
