داركنەتتە 15 ميلليون قازاقستاندىقتىڭ جەكە مالىمەتتەرى قامتىلعان دەرەكتەر بازاسى ساتىلىمعا قويىلدى. بۇل ەل حالقىنىڭ شامامەن تورتتەن ءۇشىن قۇرايدى، دەپ حابارلايدى «ادىرنا» ءتىلشىسى Mash-قا سىلتەمە جاساپ.
ساتۋشى اتالعان اقپاراتتى eGov مەملەكەتتىك سەرۆيسىن بۇزۋ ارقىلى العانىن مالىمدەگەن.
Shymzz13 لاقاپ اتىمەن تىركەلگەن قولدانۋشى بازانى 0,5 بيتكوينعا، ياعني شامامەن 32 مىڭ اقش دوللارىنا باعالاعان. كولەمى 2,7 گيگابايت بولاتىن مۇراعاتتا 47 ميلليون جول اقپارات ساقتالعان. ونىڭ ىشىندە جەكە كۋالىك دەرەكتەرى، تەلەفون نومىرلەرى، ەلەكتروندىق پوشتا مەكەنجايلارى، جۇمىس ورىندارى، قۇجاتتاردىڭ سكان-كوشىرمەلەرى جانە قۇپياسوزدەر بار.
eGov پلاتفورماسىندا بۇعان دەيىن دە ءتۇرلى اقاۋلار تىركەلگەن. تامىز ايىنىڭ باسىندا كەيبىر پايدالانۋعا وزگە ازاماتتاردىڭ جەكە پاراقشالارى اشىلعان بولاتىن. ال كوكتەمدە قازاقستاندىق قارجىگەر پورتال ارقىلى كومپانيانى تىركەگەننەن كەيىن بىرنەشە ساعات وتپەي جاتىپ جارنامالىق قوڭىراۋلار الا باستاعانىن ايتقان.
ماۋسىم ايىندا جەتىسۋ وبلىسىندا 16 ميلليونعا جۋىق قازاقستاندىقتىڭ جەكە دەرەكتەرى ساقتالعان بازا تاركىلەنگەن ەدى. تەرگەۋ مالىمەتىنشە، كوللەكتورلىق اگەنتتىك قىزمەتكەرلەرى ازاماتتاردىڭ جسن-ءى، تەلەفون نومىرلەرى مەن تۇرعىلىقتى مەكەنجايلارى تۋرالى اقپاراتتى زاڭسىز پايدالانعان.
كيبەرقاۋىپسىزدىك سالاسىنىڭ ماماندارى بۇل دەرەكتەر بازاسىن الاياقتىقپەن اينالىساتىن كولل-ورتالىقتار ساتىپ الۋى مۇمكىن دەپ الاڭدايدى. بۇعان دەيىن الاياقتار قازاقستاندى رەسەيمەن شاتاستىرىپ، پاۆلودارداعى زەينەتكەرلەردى الداپ، بانك عيماراتىندا جارىلىس جاساۋعا يتەرمەلەگەن ەدى.
ۇكىمەتتىڭ ەسەپتىك وتىرىسىندا پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ eGov 3.0 پورتالىنىڭ جاڭارتىلعان نۇسقاسى ىسكە قوسىلعانىن حابارلاعان. ونىڭ ايتۋىنشا، جىل سوڭىنا دەيىن مەملەكەتتىك قىزمەتتەردىڭ شامامەن 70 پايىزى eGov GPT ينتەللەكتۋالدى كومەكشىسى ارقىلى قولجەتىمدى بولادى.
