Qazaqstandyq seleksionerler Qyrǧyzstannan 1 million dollarǧa baǧalanǧan ataqty qoşqardyŋ tūqymyn satyp aldy, dep habarlaidy “Adyrna” tılşısı.
Ol Qyrǧyzstannan ataqty Frankel qoşqarynyŋ tūqymynan şyqqan qozy bolǧan.
19 qyrküiekte Qyrǧyzstannyŋ Şu oblysy Qyzyl-Oi auylynda ötken halyqaralyq festivalde Frankel qoşqary qatysuşylardyŋ erekşe nazaryn audarǧan. Is-şaraǧa Qazaqstan, Özbekstan, Resei, Täjıkstan jäne Qyrǧyzstannan fermerler qatysty.
Fermer Ūlan Atabaev Frankeldı «baǧasyz qoşqar» dep atady.
«Kez kelgen qoşqardan mūndai töl tarai bermeidı. Frankeldıŋ tūqymynan şyqqan qozylardyŋ genetikalyq körsetkışterı joǧary. Tıptı keibırı atasynan da asyp tüsedı», – dedı Ūlan Atabaev.
Frankeldıŋ tüsı de erekşe sanalady. Onyŋ jünı aşyq qyzyl tüstı. Qoşqardyŋ denesı ūzyn, süiegı ırı, tūmsyǧy döŋes, al qūlaǧynyŋ ūzyndyǧy şamamen 25 santimetr. Fermerdıŋ sözınşe, Qazaqstanda onyŋ qatarlastarynan mūndai sipattarǧa ie qarsylas kezdespegen.
Araşan ettı-maily qoi tūqymyn qyrǧyz mamandary 1970-2021 jyldar aralyǧynda şyǧarǧan. Eresek qoşqarlardyŋ salmaǧy 109-177 kelıge deiın jetedı. Qazır Qyrǧyzstan şaruaşylyqtarynda osy tūqymǧa jatatyn 5 832 qoi bar.
Fermerler qarapaiym qozyny şamamen 1 myŋ dollarǧa, al saulyq qoidy 5 myŋ dollarǧa baǧalaidy.
Sonymen qatar qyrǧyzstandyq qoi ösıruşıler būl tūqymdy Ginnestıŋ rekordtar kıtabyna engızuge ötınış bergen.
