Almatyda SkyTrain poiyzdary 8-14 metr biıktıkte jüredı. Būl turaly qalalyq jol infraqūrylymyn damytu basqarmasy aitty, dep habarlaidy «Adyrna» tılşısı informburo.kz-ke sılteme jasap.
Būǧan deiın SkyTrain jelılerı jol keptelısıne täueldılıktı azaitu üşın estakadalar boiymen salynatyny habarlanǧan edı. Basqarmanyŋ mälımetınşe, estakadalardyŋ biıktıgı şamamen 8-12 metr bolady, al keibır uchaskelerde 12-14 metrge deiın jetedı.
Jalpy ūzyndyǧy 46,4 şaqyrym bolatyn ekı SkyTrain jelısınıŋ qūrylysy 2027 jyly bastalady. Bırınşı jelını 2029 jyly aiaqtau josparlanǧan. Al ekınşı jelınıŋ qūrylysy qaşan aiaqtalatyny jobalyq-smetalyq qūjattama äzırleu kezeŋınde naqtylanady.
Bırınşı jelınıŋ ūzyndyǧy 22,5 şaqyrymdy qūraidy. Ol «Barlyq» jäne «Şyǧys» kölık-logistikalyq toraptary arasynda Raiymbek daŋǧylynyŋ boiymen ötedı. Joba aiasynda 13 aialdama keşenı men avtotūraqtar qarastyrylǧan. Ekınşı jelınıŋ ūzyndyǧy 23,9 şaqyrym bolady, onda 14 aialdama keşenın salu josparlanyp otyr.
Äzırge qanşa poiyz satyp alynatyny jäne olardyŋ qaşan jetkızıletını belgısız. Maşinisterdı ırıkteu men oqytu jūmystary jobany ıske qosu merzımı jaqyndaǧanda bastalmaq.
Eske salaiyq, Astanadaǧy LRT jobasyna mamandardy qabyldau 2024 jyldyŋ soŋynda bastalyp, Tarlan Astana oqu baǧdarlamasy 2026 jyldyŋ mamyrynda ıske qosylǧan edı.
SkyTrain qūrylysynyŋ naqty qūny äzırge belgısız. Basqarma ökılderınıŋ aituynşa, onyŋ baǧasy jobalyq qūjattar daiyndalyp, memlekettık saraptamanyŋ qorytyndysy şyqqannan keiın anyqtalady.
SkyTrain – joǧary jyldamdyqty zamanaui äue relstı kölık jüiesı. Mūndai jelılerdıŋ köpşılıgı biıktıkte salynady jäne keibırı maşinissız jūmys ısteidı.
