1 qazan – halyqaralyq Qarttar künıne orai Semei qalasynda saltanatty qabyldau şarasy öttı. Qariialarǧa qūrmet körsetuge arnalǧan jiynǧa oblys äkımı Berık Uäli, öŋırdıŋ qala-audandarynan ardagerler qatysty.
Aimaq basşysy ardagerlerdı merekemen qūttyqtap, olardyŋ qoǧamdaǧy orny men sıŋırgen eŋbegıne qūrmet bıldırdı.
«Barşaŋyzdy Halyqaralyq qarttar künımen şyn jürekten qūttyqtaimyn! Qazaqta: «Qarty bar üidıŋ qazynasy bar», – deidı. Rasynda, ülkendı syilap, aqsaqaldy törge şyǧaryp, aq jaulyqty anany ardaqtaǧan ataly joldy bügınde jalǧastyrmaq nietımız bar. Sondyqtan bügıngı basqosuymyzdyŋ «Qarttarǧa qūrmet – ūrpaqqa mındet» dep ataluynyŋ özınde ülken män jatyr. Sızderdıŋ elge sıŋırgen qyzmetterıŋız ben ömırden tüigen täjıribelerıŋız keiıngı buyn üşın ülgı-önege, baǧa jetpes qazyna. Memleket basşysy Qasym-Jomart Kemelūly Toqaev aǧa buynǧa degen qūrmet pen olardyŋ äleumettık äl-auqatyn arttyru mäselesıne erekşe män berıp keledı. «Ardagerler turaly» zaŋ osy baǧyttaǧy memlekettık qoldaudy jüieleuge berık negız qalady. Prezidentımız qoǧamda «Zaŋ men tärtıp», «Adal azamat» qaǧidattaryn ornyqtyruǧa erekşe män beredı. Būl qūndylyqtardy jas ūrpaqtyŋ boiyna sıŋırude sızderdıŋ aqyl-keŋesterıŋız ben ömırlık täjıribelerıŋızdıŋ orny bölek. Sızderge zor densaulyq, ūzaq ǧūmyr, jaqyndaryŋyzǧa amandyq, şaŋyraqtaryŋyzǧa baq-bereke tıleimın», – dedı Berık Uäli.
Şara barysynda öŋırdıŋ är salasynda eŋbegımen elengen ardagerler «Abai oblysyna sıŋırgen eŋbegı üşın» tösbelgısımen, oblys äkımınıŋ Alǧys hattarymen, respublikalyq Ardagerler ūiymynyŋ «Qūrmet» tösbelgısımen jäne Alǧys hattarymen marapattaldy.
Jyly räuışte ötken kezdesude ardagerler eldıŋ bereke-bırlıgı, jastardyŋ bolaşaǧy turaly oilaryn ortaǧa saldy.
Abai oblysynda ardagerlerdı qoldauǧa baǧyttalǧan jūmystar jüielı türde jürgızılude. Biyl Ūly Otan soǧysynyŋ ardagerıne 5 million teŋge kölemınde bırjolǧy äleumettık kömek körsetıldı. Jeŋıs künı qarsaŋynda 1 146 adamǧa 158 myŋ teŋge kölemınde bırjolǧy äleumettık kömek berıldı.
Bügınde aimaqta 2 639 zeinetker arnaiy äleumettık qyzmettermen qamtylǧan. Qart jandardyŋ belsendı ömır saltyn jalǧastyruyna da jaǧdai jasaluda. Qazırgı taŋda oblysymyzda 395 bastauyş ardagerler ūiymy, 2 qalalyq jäne 10 audandyq ardagerler keŋesı jūmys ısteidı.
Öŋırde 2 «Belsendı ūzaq ömır süru ortalyǧy» jūmys ısteidı. Biyl olardyŋ qataryna Kurchatov qalasynda aşylǧan jaŋa ortalyq qosyldy. Semei qalasyndaǧy ortalyqtyŋ 3 filialy bar. Qazırgı taŋda būl ortalyqtarda 608 zeinetker türlı qyzmettermen qamtylyp otyr.
