Kópbalaly áke Kókshetaý qalasynyń aýmaǵynda gashısh satýmen aınalysqan. Sot ony 6 jylǵa bas bostandyǵynan aıyrdy, – dep habarlaıdy «Adyrna» tilshisi Polisia.kz-ke silteme jasap.
Kókshetaý qalalyq soty iri kólemde gashısh satýmen aınalysqan 40 jastaǵy turǵynǵa qatysty úkim shyǵardy. Esirtki satýshyǵa qaýipsizdigi ortasha qylmystyq-atqarý júıesi mekemesinde 6 jyl bas bostandyǵynan aıyrý jazasy taǵaıyndaldy.
Aıyptalýshynyń zańsyz áreketi osy jyldyń aqpan aıynda toqtatyldy.
Kókshetaý turǵyny esirtkini materıaldyq baıý maqsatynda zańsyz saqtap, keıinnen ótkizýge baǵyttalǵan qylmystyq nıeti bolyp, jalpy salmaǵy 9,46 gramm gashıshti eki qaǵaz túıinshegin satqan, bul óz kezeginde úlken ólshem bolyp sanalady.
“Satyp alý – satý” mámilesinen keıin birden satýshyny Esirtki qylmysyna qarsy is-qımyl basqarmasynyń qyzmetkerleri ustady. Oǵan qatysty tergeýshiler QR QK 297-baby 2-bóligi (Esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý) boıynsha sotqa deıingi is júrgizýdi bastady.
