Qoǵam belsendileri ózderiniń áleýmettik jelileri arqyly almatylyqtardy saılaý naýqanynyń barysy men Qazaqstan Respýblıkasy Prezıdenti saılaýynyń ótkizilý úrdisin baqylaýǵa qatysýǵa shaqyrdy. Bul týraly jýrnalısterge qor belsendisi, qoǵam qaıratkeri, Independ Digital Agency basshysy Rafael Gasanov aıtty, dep habarlaıdy "Adyrna" tilshisi.
Belsendiniń aıtýynsha, qazirdiń ózinde 100 azamat baqylaýshy bolýǵa nıet bildirgen.
– Baqylaý úrdisin júrgizý úshin ádette bizge 500-600-deı adam qosylady, ótken referendýmda da, ótken Májilis saılaýynda da solaı boldy, bul joly baqylaýshylar odan kem bolmaıdy dep senemiz, – dedi qoǵam qaıratkeri.
Rafael Gasanov málimdegendeı, jaqyn arada baqylaýshylar mektebi óz jumysyn bastamaq, belsendiler onyń ashylǵany týraly áleýmettik jelilerdegi paraqshalarynda habarlaıdy. Dárisker retinde saılaý ýchaskelerinde jumys tájirıbesi bar volonterler qatysady. Eriktilermen qosa zańgerler de shaqyrylady, olar bolashaq baıqaýshylardy saılaý zańnamasynyń negizderimen tanystyrady. Barlyq belsendiler anyqtamalyq ádebıettermen, atap aıtqanda, «baqylaýshy dápterimen» qamtamasyz etiledi, bul olarǵa saılaý ýchaskeleri men saılaý barysyn monıtorıngileý men baqylaý kezinde quqyqtyq resýrs retinde qajet bolady.
Rafael Gasanov tujyrymdaǵandaı, «Qoǵamdyq pikir» qorynyń baqylaýshylary saılaý ýchaskeleriniń saılaýǵa daıyndyǵyn, atap aıtqanda, olardyń qajetti qural-jabdyqtarmen jáne erekshe qajettilikteri bar adamdar úshin ınfraqurylymmen qamtamasyz etilýin tekseredi.
Saılaý kúni saılaý ýchaskelerine baıqaýshylar bekitilip, olar monıtorıng júrgizip, saılaý barysyn baqylaıdy. Sondaı-aq qoǵamdyq belsendiler sapynan mobıldi toptar qurylady. Olar daýly máseleler, zań talaptarynyń saqtalýy, daýys berý erejeleri boıynsha suraqtar týyndaǵan jaǵdaıda jedel túrde saılaý ýchaskelerine barady.
Saılaý kúni qoǵamdyq belsendiler jarty saǵat saıyn saılaý naýqany barysy týraly esep daıyndaıdy. Olar óńirlerdegi ókildermen onlaın rejımde pikir, derek almasady, bul búkil eldegi daýys berý barysyna taldaý jasaýǵa múmkindik beredi.
Rafael Gasanov bul jumystardyń qorytyndysy boıynsha qoǵamdyq belsendiler arnaıy qarar daıyndaıtynyn aıtty. Bul qujatta olar ózderiniń barlyq baqylaý jumystarynyń nátıjelerin kórsetedi. Qarar OSK-ǵa jiberiledi.
Brıfıngte Rafael Gasanovpen qatar basqa da qoǵamdyq belsendiler – jýrnalıst, bloger, «Anyq Time» telebaǵdarlamasynyń júrgizýshisi Maqsat Mamadııarov jáne t.b. sóz sóıledi. Olar kámelettik jasqa tolǵan jastardy baqylaý proesine belsendi qatysýǵa shaqyrdy.
