Búgin Shymkent qalasy ákimdiginde Shymkent qalasy Kásipkerler palatasynyń dırektory Nurlan Qabyshtaevtyń qatysýymen Óńirlik kásipkerler palatalary janyndaǵy óńirlik keńeske múshelerdi saılaý boıynsha brıfıng ótti.
Baspasóz májilisinde N.Qabyshtaev óńirlik keńeske kandıdattardan ótinish qabyldaý búgin 7 shildede bastalǵanyn jetkizip, oǵan qosa atalǵan keńestiń róli týraly sóz qozǵady.
– «Atameken» kásipkerlik palatasynda óńirlik keńes degen organ bar. Ol – ár óńirdiń kásipkerlik ahýalyn baqylap, kásipkerlik palatasynyń máselelerin kóteretin mekeme. Bizdiń óńirlik keńeste 30 kásipker bar edi. Onyń quramyn tarqatqanbyz. Osyǵan oraı saılaý ótpek. Búginnen bastap 15 shildege deıin qujattar qabyldanady. Kandıdattar 16–19 shilde aralyǵynda úgit-nasıhat jumystaryn júrgizedi (qarjy bólinbegen), al daýys berý onlaın rejımde 20–22 shilde aralyǵynda ótedi. Jańa óńirlik keńestiń quramy 3 tamyz kúni jarııalanady. Bul keńestiń róli óte mańyzdy. Keńes músheleri óz máselelerin kóterýmen qatar, bılik pen bıznes arasyndaǵy altyn kópir rólin atqarady. Iaǵnı, búgingi epıdemıologııalyq ahýalǵa baılanysty shekteý sharalary kezinde dúnıejúzilik tájirıbege súıenip, eki tarapqa da zııany tımeıtin sheshimder men antıkrızısti joldardy tabýymyz kerek. Bıznes jumys istese, ol – qosymsha salyq, qosymsha jalaqy, al jumys orny – áleýmettik jaǵdaıdyń mańyzdy ındıkatory», – dedi Kásipkerler palatasynyń dırektory.
Óńirlik keńes músheligine úmitker kelesi talaptarǵa sáıkes kelýi tıis:
Qazaqstan Respýblıkasynyń azamaty bolý;
Óńirdiń áleýmettik-qoǵamdyq ómirine belsendi qatysýshy bolý;
Kásipkerler arasynda pikir kóshbasshylarynyń biri bolý;
Óńirde jarııa tulǵa bolý;
Kásipkerler arasynda jáne qoǵamda oń bedelge ıe bolý;
Bıznesiniń tarıhy oń bolýy;
Áleýmettik jaýapty kásipker bolý;
Oblystyq, qalalyq máslıhattardyń depýtaty bolýy quptalady;
Zańmen belgilengen tártipte ótelmegen nemese alynbaǵan sottylyǵynyń bolmaýy.
Aıta keteıik, qujattardy oflaın nysanda Shymkent qalasy kásipkerler palatasyna (Shymkent q., «Soltústik-Shyǵys» y/a, Erimbetov kóshesi, 304 G, «Zańǵar» bıznes ortalyǵy, 2-qabat) nemese onlaın nysanda vote.atameken.kz saıty arqyly jibere alady. Sondaı-aq 1432 Call-ortalyǵynan alýǵa bolady. Shymkent qalasy kásipkerler palatasynyń baılanys telefondary: 8 /7252/ 39-49-77, 8 707 107 00 13.
Shymkent
