قوعام بەلسەندىلەرى وزدەرىنىڭ الەۋمەتتىك جەلىلەرى ارقىلى الماتىلىقتاردى سايلاۋ ناۋقانىنىڭ بارىسى مەن قازاقستان رەسپۋبليكاسى پرەزيدەنتى سايلاۋىنىڭ وتكىزىلۋ ءۇردىسىن باقىلاۋعا قاتىسۋعا شاقىردى. بۇل تۋرالى جۋرناليستەرگە قور بەلسەندىسى، قوعام قايراتكەرى، Independ Digital Agency باسشىسى رافاەل گاسانوۆ ايتتى، دەپ حابارلايدى "ادىرنا" ءتىلشىسى.
بەلسەندىنىڭ ايتۋىنشا، قازىردىڭ وزىندە 100 ازامات باقىلاۋشى بولۋعا نيەت بىلدىرگەن.
– باقىلاۋ ءۇردىسىن جۇرگىزۋ ءۇشىن ادەتتە بىزگە 500-600-دەي ادام قوسىلادى، وتكەن رەفەرەندۋمدا دا، وتكەن ءماجىلىس سايلاۋىندا دا سولاي بولدى، بۇل جولى باقىلاۋشىلار ودان كەم بولمايدى دەپ سەنەمىز، – دەدى قوعام قايراتكەرى.
رافاەل گاسانوۆ مالىمدەگەندەي، جاقىن ارادا باقىلاۋشىلار مەكتەبى ءوز جۇمىسىن باستاماق، بەلسەندىلەر ونىڭ اشىلعانى تۋرالى الەۋمەتتىك جەلىلەردەگى پاراقشالارىندا حابارلايدى. دارىسكەر رەتىندە سايلاۋ ۋچاسكەلەرىندە جۇمىس تاجىريبەسى بار ۆولونتەرلەر قاتىسادى. ەرىكتىلەرمەن قوسا زاڭگەرلەر دە شاقىرىلادى، ولار بولاشاق بايقاۋشىلاردى سايلاۋ زاڭناماسىنىڭ نەگىزدەرىمەن تانىستىرادى. بارلىق بەلسەندىلەر انىقتامالىق ادەبيەتتەرمەن، اتاپ ايتقاندا، «باقىلاۋشى داپتەرىمەن» قامتاماسىز ەتىلەدى، بۇل ولارعا سايلاۋ ۋچاسكەلەرى مەن سايلاۋ بارىسىن مونيتورينگىلەۋ مەن باقىلاۋ كەزىندە قۇقىقتىق رەسۋرس رەتىندە قاجەت بولادى.
رافاەل گاسانوۆ تۇجىرىمداعانداي، «قوعامدىق پىكىر» قورىنىڭ باقىلاۋشىلارى سايلاۋ ۋچاسكەلەرىنىڭ سايلاۋعا دايىندىعىن، اتاپ ايتقاندا، ولاردىڭ قاجەتتى قۇرال-جابدىقتارمەن جانە ەرەكشە قاجەتتىلىكتەرى بار ادامدار ءۇشىن ينفراقۇرىلىممەن قامتاماسىز ەتىلۋىن تەكسەرەدى.
سايلاۋ كۇنى سايلاۋ ۋچاسكەلەرىنە بايقاۋشىلار بەكىتىلىپ، ولار مونيتورينگ جۇرگىزىپ، سايلاۋ بارىسىن باقىلايدى. سونداي-اق قوعامدىق بەلسەندىلەر ساپىنان ءموبيلدى توپتار قۇرىلادى. ولار داۋلى ماسەلەلەر، زاڭ تالاپتارىنىڭ ساقتالۋى، داۋىس بەرۋ ەرەجەلەرى بويىنشا سۇراقتار تۋىنداعان جاعدايدا جەدەل تۇردە سايلاۋ ۋچاسكەلەرىنە بارادى.
سايلاۋ كۇنى قوعامدىق بەلسەندىلەر جارتى ساعات سايىن سايلاۋ ناۋقانى بارىسى تۋرالى ەسەپ دايىندايدى. ولار وڭىرلەردەگى وكىلدەرمەن ونلاين رەجيمدە پىكىر، دەرەك الماسادى، بۇل بۇكىل ەلدەگى داۋىس بەرۋ بارىسىنا تالداۋ جاساۋعا مۇمكىندىك بەرەدى.
رافاەل گاسانوۆ بۇل جۇمىستاردىڭ قورىتىندىسى بويىنشا قوعامدىق بەلسەندىلەر ارنايى قارار دايىندايتىنىن ايتتى. بۇل قۇجاتتا ولار وزدەرىنىڭ بارلىق باقىلاۋ جۇمىستارىنىڭ ناتيجەلەرىن كورسەتەدى. قارار وسك-عا جىبەرىلەدى.
بريفينگتە رافاەل گاسانوۆپەن قاتار باسقا دا قوعامدىق بەلسەندىلەر – جۋرناليست، بلوگەر، «Aنىق Time» تەلەباعدارلاماسىنىڭ جۇرگىزۋشىسى ماقسات مامادياروۆ جانە ت.ب. ءسوز سويلەدى. ولار كامەلەتتىك جاسقا تولعان جاستاردى باقىلاۋ پروتسەسىنە بەلسەندى قاتىسۋعا شاقىردى.
