Osydan bir kún buryn ereýil atqa er salǵan azamattar Oral shaharynan Syrym dalasyna qaraı bet alǵan edi. Tý astynda týlaǵan tulparlar tuıaǵy keshe qas qaraıa Batys óńirimizdiń baıtaq dalasyn kesip ótip, Jympıtyǵa aman ilikti. «Ereýil atqa er salyp, eńký – eńký jer shalyp» kele jatqan joryqshylardy qala bettegi qaqpanyń aldynan aýyldan shyqqan bir top attyly qara qıqý aıryqsha qurmetpen kútip aldy.
Yrǵatylyp aqqan Aq Jaıyqtyń boıy - Syrymnyń qalyń qolmen kazak bekinisterin shapqan jeri. Qııan-keski urystar ótken alqap. Borbastaý, Shalqar alqaby – batyrdyń saıası qarsylasy, Kishi júzdiń hany Nuralynyń qonys aýystyryp júrgende, ýaqytsha turaqtap, orda tikken oryny. Sholaqańqatynyń boıynda Syrym shyqqan taý tóbe tur. Mine sol sebepti, Respýblıka kúni men dalanyń dańqty batyry, bıi Syrym Datulynyń 280 jyldyǵy qurmetine jolǵa shyqqan jigitter joryqtaryn «Syrym batyr jolymen...» dep atapty.
Ideıa avtory – belgili kásipker Muratbek Muhamedıev. Attylardyń ishindegi Syrym batyrdyń tól urpaǵy, 11 jasar Sherhan Qaıyrsapa batyr da bar.
Sapar barysynda salt atty joryqshylar Syrym baba kesenesiniń mańyna aıaldap, at sýytty. Tańda turyp, kún shapaǵymen jarysyp, saparlaryn jalǵastyrdy.
«Syrym batyr jolymen...» kelgen kerýendi saltanatty qarsylaý sharasy S. Datuly atyndaǵy stadıonda ótti. Syrym aýdanynyń ákimi Tólegen Tóreǵalıev dalany dúbirge bólegen 140 shaqyrymdyq joryqtyń astarynda eljandy azamattardyń «uıqydaǵy rýhty oıatar» nıeti men týǵan jerge degen qurmetteri jatqanyn aıtty. Atty toptyń atynan QMDB – nyń BQO ókil ımamy Baqytjan Quralbaıuly sóz sóıledi. Joryq týy saltanatty túrde Syrym aýdanyna tabystaldy.
Bizdińshe, sapar Jympıtydan Qaratóbe, odan ári Oıyl, Qıyl, Jem, Saǵyz aınalyp, Syrymnyń halyq keńesin qurǵan tarıhı jerge deıin jalǵasýy kerek syqyldy.
Osy kúni Syrym aýdanynda «Qaısar» sport klýbynyń uıymdastyrýymen aýdaryspaqtan aýdan birinshiligi ótti. Kúlik ústindegi kúrestiń jeńimpazdaryn sambodan 4 dúrkin Álem chempıony, Oral qalasyndaǵy balalar men jasóspirimderdiń ulttyq sport mektebiniń dırektory Erbolat Baıbatyrov marapattady.
Baýyrjan ShIRMEDINULY,
Syrym aýdany
"Adyrna" ulttyq portaly
