Shıetteı balalaryn ósirý úshin ólimdi jeńgen ana taǵdyry kópshilikti tánti etti

3075
Adyrna.kz Telegram

Tehasta týyp-ósken Marıon Lýna Brem 17 jasynda áskerı adamǵa kúıeýge shyǵady. Bir jyldan soń tuńǵysh uly, bes jyldan soń ekinshi uly dúnıe esigin ashty. Amerıkalyq otbasy tatý-tátti ómir súredi.

1984 jyly Lýna Brem 30 jasqa tolady. Ókinishke qaraı, keıipkerimizde eki jaqty onkologııa anyqtalyp, ol birneshe ota jasatady (Gınekologııalyq jáne anaryn alyp tastaý boıynsha). Osydan keıin hımıoterapııa bastalady. Sonyń saldarynan Marıon taz bop qalady. Dárigerler oǵan eki-úsh jyldyq ómiriń qaldy dep boljam aıtady. Kúıeýi bar qıyndyqty kóre turyp, Marıondy tastap ketedi. Uldarynyń úlkeni 12-de, kishisi 7-de bolady. Eshqashan jumys istemegen jas kelinshek jalǵyz qalady. Onyń ústine otaǵa tólenetin biraz qarjy moınyna qaryz bolyp ilinedi.

Úı tirliginen asyp eshteńe istep kórmegen áıel balalaryn qalaı asyraımyn dep oılanady. Bir kúni basy qatty aýyryp, vannada ustamasy ustap qalady. Sóıtip jatqanda asúıden uldarynyń kúlgen daýysyn estıdi. Sol sátte mıynda bir nárse qosylady. Qaıtsem de dertimnen saýyǵamyn dep ornynan turady.

Marıon kólik satýdan jaqsy tabys tabýǵa bolatynyn jaqsy biletin. Ol avtodıllerlerge baryp óz qyzmetin usynady. Biraq bul salada tek er adamdar ǵana jumys isteıtinin baıqaıdy. Ol eki apta ishinde 16 adamnan joq degen jaýap alady. Strategııasyn aýystyrmasa úmiti úziletinin sezgen ol 17-shi ret jumys suraýdyń ornyna jumys berýshige: «Seniń kompanııań maǵan muqtaj, meni alsań, tabysqa kenelesiń» dep kesip aıtady. Ony jumysqa alady.

Ol kólik satýshy áıel retinde erlerge qaraǵanda birshama artyqshylyǵyn sezinedi. Kólik alýǵa kelgenderdiń jubaılaryna qandaı kólik alý qajetin túsindirip otyrady. Al erkek satýshylar kóbine kúıeýlerdi satyp alýǵa kóndirýge tyrysatyn-dy.

Alǵashqy eńbek jyly Lýna Brem jyl satýshysy degen ataqty alady. Oǵan erler taǵatyn Roleks saǵatyn qosyp beredi. Ony tek er adamdarǵa ǵana beredi eken. Sol sátte dárigerler onyń onkologııasy remıssııaǵa túskenin habarlaıdy. Marıon kúsh jınaı bastaıdy.

Odan keıingi eki jyl óte tabysty bolady. Ol ózin bastyq etip qoıýdy usynady. Biraq jumys berýshi «sen kólik satýdan ketseń, paıda túspeı qalady» dep onyń usynysyn qabyldamaı tastaıdy.

Biraq Marıon jańa jumys izdeýge shyǵady. Eki aptadan soń basqa bir avtodıller ony ózi qalaǵan laýazymǵa jumysqa alady. Sodan bastap onyń laýazymy kún ótken saıyn óse beredi.

Taǵy eki jyl ótkende ózi de avtodıller bolýǵa qarjy jınaýdy bastaıdy. Bar-joǵy $800 000 jetpeı turdy. Bul ol úshin túske kiretin soma bolatyn. Marıon taǵy da oılanady. Biraq bilek sybana kirisedi. Bıznes-jospar jazyp, oǵan óziniń ómirbaıanyn qosyp, ınvestor taýyp beretin 50 aýdıtorlyq kompanııaǵa taratady.

Eki aptadan soń ınvestor tabylady. Lýna Brem óziniń avtosalonyn ashady. Chrysler kólikterin satýmen shuǵyldanady. Sóıtip, 1989 jyly júrek taǵylǵan «Love Chrysler» saýdaǵa shyǵady. «Bul jaı júrek emes, bul bizdiń adamdardyń júregi, biz Tehasqa mahabbatymyzdy arnaımyz» degen uranmen óz isin bastaıdy.

Marıonnyń talpynysy eselep qaıtty. Búginde onyń obyry jazyldy. Eki avtosalony bar. Jyldyq aınalymy $45 mln. dollar. Kitap jazýdy unatady. Otyz jasynda kúrdeli ota jasatýy, kúıeýi tastap ketýi bar, dárigerler óledi dep kún sanaǵan adam emdelip, óz isin bastap, mıllıondap tabys tapqany tańqalarlyq jaǵdaı ma? Árıne!

Ol uldarynyń daýysyn estip, óz ómirin qolǵa aldy. Arzan parık kıip, erlerdiń álemine qadam basty. Uldaryna buryn-sońdy bere almaǵan baqytty balalyq shaq syılady.

«Keıde jaı esik qaǵý azdyq etedi. Keıde esikti syndyryp kirý kerek» deıdi Marıon.

Aýdarǵan Shynar Ábilda

"Adyrna" ulttyq portaly

Pikirler