28 qaraşa künı Almatydaǧy Saparǧali Begalin atyndaǧy balalar kıtaphanasynda 1986 jyly oryn alǧan Jeltoqsan köterılısıne qatysqan Amanǧazy Kärıpjanūly jäne Anar Rahymjanovamen kezdesu öttı.
Kıtaphana ūjymy būl kezdesuge aldyn-ala derektı film körsetudı josparlaǧan eken. Jinalǧan oquşylar men qonaqtar osy filmdı kördı. Derektı filmde Almatydaǧy basty alaŋǧa şyqqan jastardyŋ beibıt şeruı men olarǧa qarsy şyqqan mūzdai qarulanǧan äskerler şyqqanyn köru kımge bolsada oŋaiǧa soqqan joq.
Tarihi kadrlerge köztıgıp otyrǧan ūldar men qyzdar sol bır arly da suyǧy qatty yzǧary jeltoqsan kezınde älı düiege kelmegen edı. Olardyŋ janarlarynda būndai boluy mümkın be, degen sūraq körıngendei edı.
Kezek qonaqtarǧa keldı. Bırınşı söz alǧan Anar Rahymjanova bırden söilemei, aldynda otyrǧan jas balalarǧa qarady. Ol sol kezde özınıŋ balalyq şaǧyn eske tüsırgen boluy kerek. Boiyn jinap alǧan Jeltoqsan köterılısınıŋ batyry ırkılmei sol kezdegı bolǧan jaǧdaidy eş bükpesız aityp berdı. Qatar qūrbylaryn äskerlerdıŋ ūryp-soqqanyn, «sender bala tappaisyŋdar» dep jekıp ışterınen tepkenın, şaşynan süirelegınen, bır qūrbysynyŋ jaǧyn syndyrǧanyn, bärın-bärın aşyq baiandap berdı. Būndai jan türşıgerlık aşyq äŋgıme kımnıŋ de bolsa esınde qatty saqtalyp qalary anyq. Anardy ūstap alyp KGB ǧimaratyna aparyp qylmysker retınde suretke tüsırgen. Ūzaq uaqyt tergeuge alǧan.
Bırşama uaqytan soŋ Anardy bosatqan. Sonda tergeuşılerdıŋ bırı ūlty ūiǧyr jıgıt jäi ǧana: «Qaryndasym jolǧa aqşaŋ bar ma?" Dep sūrapty. Sodan soŋ qolyna aqşa ūstatypty. Memlekettıŋ jazalau jüiesınde ısteitın sol tergeuşı ūlty ūiǧyr jıgıtınıŋ qazaq qyzyna tuysqandyq, bauyrmaldyq jasaǧanyn Anar eşqaşan ūmytqan emes.
Jazalauşylar Anardy tūtqyndaǧan kezı suretke tüsken. Kıtaphanaşylar sol surettı ekranǧa ülkeitıp körsettı. Zalda otyrǧandar jazalauşylar ekı jaǧynan qorşap bara jatqan jap-jas qazaq qyzynyŋ aldarynda otyrǧan Anar apasy ekenıne sene almaǧandai. Bıraq būl sol kezgı sūm zamannyŋ şyndyǧy edı.
Anar jūmystan şyǧaryluy tiıs bolatyn. Bıraq basşysy ukrain azamaty Anardy aman alyp qalypty. Mıne, būl sol avtoritarly bilıktıŋ saiasaty jürıp tūrǧan kezde, jüielı türde oilaityn öz basyn qaterge tıkken ary taza adamnyŋ ısı edı.
Ekınşı bolyp jeltoqsanşy, aqyn Amanǧazy estelık aitty. Onyŋ da äŋgımesı sol kezdegı alaŋda beibıt şeruge şyqqan jastarǧa qarumen şabuyl jasalǧan kezdı baiandady. Özınıŋ közımen körgenın sol qalpyndai aityp berdı. Jeltoqsan oqiǧasyna bailanysty şyǧarǧan kıtaptaryn körsetıp, özınıŋ öleŋderın oqydy.
Öz kezegınde jastar qonaqtarǧa köptegen sūraqtar qoidy. Qonaqtarǧa būl sūraqtarǧa jauap beru oŋai bolǧan joq. Kezdesu soŋynda kıtaphana ūjymy Jetoqsan köterılısınıŋ batyrlaryna syilyqtar ūsyndy. Kezdesuge qatysqandar qonaqtarmen bırge suretke tüstı.
"Adyrna" portaly
