"Adyrna" portalyna jas sýretshiniń óz ıdeıasy men eńbeginiń qaz-qalpynda qoldy bolǵanyna ashynyp jazǵan haty kelip tústi. Onyń Taldyqorǵan qalasyndaǵy kópqabatty úı qabyrǵasyna bederlegen keskindemesi (mýralynyń) urlanǵan. Mýraldyń eskızi Almaty qalasyndaǵy úılerdiń birinde ruqsatsyz kóshirlip, boıalǵan. Sýretshiniń shaǵymyna ákimdik te, quzyrly organdar da mandyrtyp jaýap bermeı otyr.
Qajyr-qaırat pen yjdaǵattylyqty, shyǵarmashylyq kórkemdikti qajet etetin týyndyny avtor oıynda jańǵyrtyp, mereke kúnine oraı jaryqqa shyǵarady. Alaıda keıinnen óz týyndysynyń aına-qatesiz kóshirmesimen ózi Almaty qalasynda jolyǵady.
"Men - Imanǵalı Erkeǵalı. Sizderge óz týyndymnyń ruqsatsyz urlanǵany boıynsha hat joldap otyrmyn. Meniń bezendirgen mýralym 2021 jyly Taldyqorǵan qalasynda "Qutqarýshylar kúnine" oraılastyryp salynǵan edi.
Búginde aına-qatesiz dál sondaı mýral Almaty qalasyndaǵy kópqabatty úılerdiń birine salynypty. Mýraldy "kóshirip basý" Almaty ákimdiginiń tapsyrmasy boıynsha júzege asqan. Bul Taldyqorǵan qalasynda arnaıy tapsyryspen salynǵan meniń jumysym, ony eskertpesten ruqsatsyz qoldanyp otyr.
Erekshe mýraldyń (graffıtıdiń) nobaıy Taldyqorǵan TJ departamentinde jumys isteıtin keıipkermen jeke kelisim-shart boıynsha jasaldy. Sýrettegi kishkene qyz da bizdiń qalamyzdyń turǵyny. Eskız, ıaǵnı týyndynyń nobaıyn jasaý kezinde biz fotosessııa júrgizdik. Dızaıner arnaıy eskız syzdy.
Kóp eńbek pen ýaqyt sarp ettik. Biraq "kóshirgishter" menen de, mýral keıipkerlerinen de ruqsat suramady. Osy eskızdi meniń kelisimimsiz paıdalanǵan adamdarǵa qatysty sharalar qabyldaýyńyzdy suraımyn", - dep jazylǵan hatta.
Dál qazirgi ýaqytta Almaty qalasynyń ákimi Erbolat Askarbekulyna suranys hat joldandy. Tutas úrdisti "Adyrna" ulttyq portaly baqylaýynda ustaıtyn bolady.
Qosymsha aqparat: Avtor qabyrǵa sýretiniń qaı ýaqytta salynǵanyn aıǵaqtaıtyn foto-ckrın da joldady. 17 qazan. 2021 jyl.
Almaty qalasyndaǵy kóshirme mýral:
"Adyrna" ulttyq portaly
