Irı ūrylardyŋ kökesı men atasy joǧary jaqta emes, Türkıstan oblysynda ekenın el jaqsy bıledı. Qūdaidyŋ qūtty künı «Türkıstanda eden juuşy bolyp jūmysqa kıru 800 myŋ teŋgeden bastalady» äm «aiaǧy auyr kelınşekten aman-esen bosanu üşın qyruar qarajat talap etıptı» degendı estıp-estıp meşeu küige tüskenımız ras. Endı mıne, taǧy da Türkıstan qalasy äkımdıgınıŋ «Tūrǧyn üi qatynastary jäne tūrǧyn üi bölımı» memlekettık mekemesı «Nūrly jer» baǧdarlamasy aiasynda ötkızıp jatqan konkurstarynan da ılık şyqty.
Būl keşe, bügın ǧana jarq etıp şyǧa qalǧan sybailastyq sindromy emes, jyldary boiy qatqan qasırettıŋ bır ūşy. Būl — memlekettıŋ 7.20.25 baǧdarlamasyn oŋ jambasyna ikemdegen äkımdıkterdıŋ qoiyrtpaǧy.
Şart boiynşa olar üidıŋ şarşy metrın elde joq baǧa 180-ge baǧalap, saǧat tılı tüŋgı on ekını ūrǧanda konkursty bastap ketedı. Bır qyzyǧy, konkurstyŋ talaptary asa qiyn emes. Basty şart: qolyŋdaǧy qūjattardy bırınşı bolyp tırkeu. Iаǧni tölqūjat, jūmys ornynan soŋǧy 6 ailyq körsetkış, jyljymaityn mülıktıŋ joqtyǧyn rastaityn anyqtama jäne kredittık tarihty mejege bırınşı bolyp ūsyna salsaŋ jetıp jatyr. Aitpaqşy, Türkıstan tūrǧyndarynyŋ aituynşa, eger talapqa sai bolmasaŋ, eşteŋe etpeidı, bastysy köpteu para ber de, şekesınen şertıp jürıp, qalaǧan üiıŋdı ala ber. Konkurs uaqyty 3 täulıkke sozylǧan. Dese de tüngı 00:00 bolmai jatyp, sait mız baqpai qatyp qalady. Qanşa jerden jyldamdyǧy joǧary kompiuterıŋ men ǧalamtoryŋ bolsa da, qatyp qalǧan saitty ıstete almaisyŋ. Qysqasyn aitqanda, server bır mezette ısten şyǧady. Qarapaiym būqara esıkten eŋtelep kıre almai tūrǧan sätte, serverdı būǧattaǧandar öz adamdarynyŋ qūjattaryn tırkep alady. Al sosyn uaqyt 1-2-ge jaqyndaǧanda sait qaita jandanyp sala beredı. Maksimaldy jyldamdyqpen kompiuterden köz almai otyrsaŋ da bes jüzınşı bolyp tırkelesıŋ. Qysqasy, konkursqa tüsken ary ketse toqsan üidı tek tüsıŋde köruge tura keledı. Būl turaly Türkıstan tūrǧyny Asqat Keŋesūly büi deidı.
«Konkursqa osymen üş ret qatystym. Bırınşısınde tırkele almadym. Ekınşısınde äielım 1125 bolyp tırkeldı. 1.30 saǧat otyrdyq, Üşınşısınde 1435 bop tırkeldım. Konkurstyŋ şarttary turaly aşyq ereje ne prosess turaly aqparat joq. Qūjatymyzdyŋ dūrys ne būrys ekendıgın de habarlamaidy. Qysqasy, aşyqtyq joq, küdık keledı. Būl sait bazasymen el bolyp küresu kerek! Eger köp qoldanuşyǧa bır uaqytta qyzmet körsete almasa, onda bazany qoldanystan alyp tastau kerek ne bolmasa kedergılerdı şeşu kerek. Menıŋşe, saittyŋ älsızdıgı «bır kısılerge» tiımdı. Öitkenı är päterge qol jetkızuge kömek beru qūny 500 myŋ teŋge desek, būl ıstıŋ ainalasynda bır vagon aqşa ainaluda. Iаǧni ötken 3 qaraşadan 4 qaraşaǧa qaraǧan tünde bolǧan 160 üi üşın 80 mln. qarjy ainalyp tūr degen söz»…
Al,
SHYNDYQ.KZ aqparattyq portalynyŋ bas redaktory Aika AITAHANOV:
«SAITAN ALǦYR SAIT. “7-20-25” baǧdarlamasynyŋ da şapaǧaty timedı-au! O, basta “üisız-küisız kün keşkenderge arnalǧan” dep jarnamalap edı… Däl osy baǧdarlamada üş ret baq synap kördık. Baspanaly bolmaq tügılı, tızımge ılıne almadyq. Tanystarym “öz küşıŋmen öte almaisyŋ” dep edı. Ras eken! 500 myŋ teŋgege IT mamanyn jaldap qana baspanaly boluǧa bolady eken. Mūny “estımedım” demeŋızder. Ekınıŋ bırı osy äŋgımenı aityp jür. Ansar Userbaev myrza, sız qalai būl baǧdarlamamen baspanaly boldyŋyz? Bölıse otyryŋyz!» dese, Türkıstan tūrǧyny Nauryzbai Asqarov: «Segız-aq ret qatysyp, üi ala almadym» dep ökınışın bıldırdı.
Türkıstan telearnasynyŋ tılşısı Rysgül Dosjanova da öz feisbuk paraqşasynda 00:00-de bırınşı tırkelgenge üi beretın bolsa, konkurs nege 3 künge sozylatynyn tüsınbei älek.
«Osy uaqytqa deiın qanşa dauly post oqydym, talqylau tyŋdadym. Sonda da, tüsınbeitınım: aqyry, tüngı 12 de kım bırınşı tırkelse, sol üi alatyn bolsa, nemenege oǧan ötınış beruge 3 kün uaqyt beresızder?! Kım kımdı aldap jür?! Tüngı 00:00 bolmaq tügılı, 23:55 ten bastap sait aşylmaidy ǧoi. İnternet bailanysy dep neşe oryndy auystyryp ta kördık. Jai ǧana sözım joq. Kelesı konkurs bolǧanda bar ǧoi, kamerany qosyp qoimasam», — deidı telearna tılşısı.
Qysqasyn aitqanda, jauyrdy jaba toqysaŋ da, arzan üi qaltalylardyŋ qaltasynda ketude. Osy oraida eger, SYBAILAS JEMQORLYǦY AGENTTIGINIŊ ÖZI JEMQOR BOLMASA, būl mäselenı nazarǧa alyp, şeşımın tabar degen talap-tılegımız bar.
