2023 jyly Joshy hannyń Ulytaýda taqqa otyrǵanyna 800 jyl tolady. Qazaq memleketi tarıhyndaǵy eldik mańyzy erekshe zor bul mereıtoı memlekettik deńgeıde toılanýy tıis! Bul pikirdi aqyn Qazybek Isa feısbýk paraqshasyna jarııalady, dep habarlaıdy “Adyrna” ulttyq portaly.
Qazybek Isa óz paraqshasyna QR Prezıdenti Q. Toqaev basqarǵan QR Ulttyq Keńesiniń 2019 jylǵy 06 qyrkúıektegi birinshi otyrysyndaǵy baıandamasynan úzindi jarııalady.
“Altyn Ordanyń atasy Joshy hannyń tulǵasyn asqaqtatý –túgel túrkige ortaq ıgilikti is. Alyp ımperııanyń alǵashqy astanasy Saraıshyq ta, Altyn Ordanyń tizginin balasy Batý hanǵa tapsyrǵan ákesi uly han Joshy da Qazaq jerinde jatyr… Joshy – Shyńǵys hannyń báıbishesi, qazaq qyzy qońyrat Bórteden týǵan tuńǵysh uly.
1.Joshy hannyń Ulytaýda ulyq ulystyń taǵyna otyrǵanyna 2023 jyly 800 jyl tolady. Qazaq memleketi tarıhyndaǵy eldik mańyzy erekshe zor bul mereıtoı memlekettik deńgeıde toılanýy tıis! Mine, Qazaqstan Prezıdenti aıtqandaı, Joshy hanǵa álem nazaryn naǵyz aýdarar kezeń bastaldy deýge bolady.
2.Osyndaı álem tarıhyndaǵy salmaǵy orasan sańlaq tulǵalar men mańyzy zor qalalar ózge bir eldiń enshisinde bolsa ne bolar edi... Árige barmaı-aq, kishkentaı Mońǵolııanyń ózi Joshy hannyń ákesi, álemdi bılegen Shyńǵys han arqyly dúnıe júzine dúbirin tanytyp jatyr... Múmkin biz de Shyńǵys hannyń alyp eskertkishindeı Joshy hanǵa da odan kem emes kemel eskertkish keshenin turǵyzarmyz. Ol keshende Shyńǵys hannyń da, Batý hannyń da, Bórteniń de eskertkishi tursa, tipti keremet bolar edi. Al Ulytaýda mazary jatqan Joshy hannyń eskertkishin Qazaqstan prezıdenti Qasym-Jomart Toqaev turǵyzyp jatsa, ult rýhy dúr silkiner dúbirli dúnıe bolar edi... Joshy hannyń kıeli kesenesi men keleshek keremet kesheni álem saıahatshylaryn tartyp turar tarıhı da, tartymdy da, tamasha orynǵa aınalar edi...
Óıtkeni, Ulytaýda Joshy handy ulyqtaý Altyn ordany asqaqtatýǵa bastaıdy.
3.Memleket basshysynyń Altyn ordanyń 750 jyldyǵyn merekeleý týraly eldik mańyzy erekshe baǵaly bastamasyna ult zııalylary ne deıdi? Qazaq tarıhynda, ańyzy men kúılerinde orny bar Altyn Orda men Joshy han tulǵasy kınomyzda qalaı kórinis tappaq? Ádebıetimiz ben mádenıetimizde, ǵylym men beıneleý ónerinde qalaı beınelenbek? Rýhymyzdy kóterer alyp ımperııa Altyn Ordamyzdyń tarıhyn kúndelikti nár berer rýhanı aınalymǵa qalaı qosamyz? Iá, mektep pen joǵary oqý oryndary oqýlyqtarynda bul baǵaly da, baıandy taqyrypqa basty nazar aýdarý kerek.
- Qazaq tarıhyn naqty da, shynaıy derekter negizinde qaıta jazatyn ýaqyt keldi.”,- dedi aqyn.
