Sarapshy, ekonomıkalyq qubylystar men qoǵamdyq ahýalǵa saýatty taldaý jasaıtyn maman Aıbar Oljaı Otanymyzdaǵy otbasy qurý máselesine "barlaý júrgizip kórdi". Avtordyń aıtýynsha, qoǵamdaǵy otbasy ınstıtýty álsireı bastaǵan, dep habarlaıdy "Adyrna" ulttyq portaly.
Sarapshy naqty derekterge súıene otyryp, qoǵam tynysyp tolyq sezine bilgen. Avtor birqatar mańyzdy máselenin shetin shyǵaryp qana qoımaı, statıstıkasyna úńiledi:
- Qazaqstan halqynyń úılengisi kelmeı qaldy. Ásirese almatylyqtar otbasy qurýdan qasha bastady. Ulttyq statıstıka derekterine saı, bizde 2022 jyly 128,5 myń neke tirkelgen. Bul 2021 jylmen salystyrǵanda 11,7 myń nekege az. Sonda 17 jyl burynǵy antırekord jańaryp otyr. Alańdatarlyǵy - 2006 jylǵy antırekordtyń sebebi túsinikti edi. Ol kezde neke jasyna kelgender KSRO kúıreı bastaǵan jyldary, demografııalyq quldyraý kezinde týǵandyqtan, sany az boldy da, neke de az boldy. Al qazir neke jasynda 2000 jyldary, demografııalyq bým kezinde dúnıege kelgen urpaq otyr. Olardyń sany az emes. Sonda neke qaıda? Qazaqstandaǵy adam sany kóbeıgen saıyn, resmı neke sanynyń qysqarýy qalyptasqan trend pe, álde ýaqytsha qubylys pa, osy jaǵyn anyqtaý qajet bolady. Ol úshin bizge 2023 jyldyń statıstıkasyn kútý kerek.
Aıbar Oljaı ásirese Almaty turǵyndarynyń turmys quryp, shańyraq kóterýge qulqy bolmaı qalǵanyn aıtady. Otbasy qurýǵa degen umtylystyń sıreýi ulttyq ekonomıkamyzǵa úlken soqqy bolatynyn jetkizedi.
- Ásirese Almaty resmı neke sanyn bir jylda 25 paıyzǵa qysqartqan. Bul rette, beıresmı neke (meshittegi) statıstıkasy júrgizile me, onda ósim bar, sol jaǵyn bilmeı otyrmyn. Qalaı bolǵanda da, tek resmı neke ǵana zań boıynsha jubaılarǵa teń múliktik quqyqtar beredi. Al beıresmı nekeniń esh zańdyq kúshi joq (alıment, ata-ana quqyǵy, múlik boıynsha), sondyqtan ásirese áıel úshin ol óte qaýipti qadam.
Qazaqstan ekonomıkasyna resmı otbasylar aýadaı qajet. Úı sharýashylyqtary, otbasy ınstıtýty ekonomıkanyń tiregi bolyp tabylady. Taýar men qyzmetter tizbeginde suranysty ártaraptandyratyn da - osy otbasy tutynatyn dúnıeler... Bul turǵydan alǵanda, nekeniń azaıýy bolashaqta ekonomıkalyq problemalar ákeletini anyq, - dep sózin túıindeıdi jýrnalıst.
"Adyrna" ulttyq portaly
