Nūrsūltan Nazarbaevtyŋ ınısı Bolat Nazarbaev memleketke Almatydaǧy auyr maşina jasau zauytynyŋ aksiialaryn qaitaruy tiıs. Joǧarǧy Sottyŋ azamattyq ıster jönındegı sot alqasy osyndai şeşım qabyldady, dep habarlaidy “Adyrna” ūlttyq portaly.
Joǧarǧy Sottyŋ azamattyq ıster jönındegı sot alqasy Qarjy ministrlıgınıŋ Memlekettık mülık jäne jekeşelendıru komitetı Bolat Nazarbaev pen "RLS-TM" JŞS-nıŋ "Almaty auyr maşina jasau zauyty" AQ baǧaly qaǧazdardy satyp alu-satu şartynyŋ bır bölıgın jaramsyz dep tanu turaly talaby boiynşa azamattyq ıstı qarady. Būl mäsele būǧan deiın de ärtürlı satydaǧy sottarda bırneşe ret qaralǧan.
Is materialdary boiynşa memlekettık mülık Departamentı 1998 jylǧy aqpanda "AZTM" AQ jarǧylyq qorynyŋ 31,9 paiyz mölşerınde memlekettık aksiialar paketın tender jeŋımpazy – "Temır qon" JŞS-ǧa 105,3 million teŋgege satty. Satyp alu-satu şarty zauyt qyzmetınıŋ beiının saqtau, öndırıs kölemın ūlǧaitu turaly talaptardy, sondai-aq olardyŋ oryndaluyn baqylau komitetınıŋ qūqyǧyn közdedı. 2007 jylǧy säuırde "Temır qon" JŞS Bolat Nazarbaevqa AZTM jarǧylyq kapitalynyŋ 86,78 paiyz aksiiasyn satqan. Onyŋ 31,9 paiyzy memlekettık paket boldy. Taǧy ekı jyldan keiın Memlekettık mülık komitetı, "Temır qon" JŞS jäne Bolat Nazarbaev 1998 jyly jasalǧan şart boiynşa tūlǧalardy mındettemelerıne auystyru turaly kelısım jasasty. Qūjat eger Bolat Nazarbaev talaptardy oryndamasa, ol memlekettık aksiialar paketın Komitetke qaitaruǧa mındettı ekenın közdedı.
Bıraq ol şart jasasqan künnıŋ artynşa "PLS-TM" JŞS aksiialaryn özgege satqan. Ärı qūjatta eşqandai mındetteme körsetılmeidı. Osylaişa būl ıs qaita qaralyp, naqty şeşım şyǧaryldy.
"Bolat Nazarbaev pen "PLS-TM"JŞS arasynda jarǧylyq qordyŋ 31,9 paiyzyn qūraityn "Almaty auyr maşina jasau zauyty" AQ-nyŋ jai atauly aksiialaryn satu bölıgınde jasalǧan 2009 jylǧy 2 säuırdegı baǧaly qaǧazdardy satyp alu-satu şarty jaramsyz dep tanylsyn. Bolat Nazarbaevqa "AZTM" AQ – nyŋ jai atauly aksiialaryn zauyttyŋ jarǧylyq kapitalynyŋ 31,9 paiyzy mölşerınde memleket menşıgıne qaitaruǧa mındettelsın", - delıngen qaulyda.
