"AMANAT" partiiasy Qazaqstannyŋ su basqan batys aimaǧyna gumanitarlyq kömek körsetu üşın jol tartty. Būl turaly "AMANAT" partiiasynyŋ Atqaruşy hatşysy Elnūr Beisenbaev Facebook paraqşasynda jazdy, dep habarlaidy “Adyrna” ūlttyq portaly.
“Qūrmettı dostar! Halyqty tolǧandyratyn mäselelerdı şeşu – «AMANAT» partiiasynyŋ bırınşı kezektegı mındetı.
Ötken aptada partiianyŋ respublikalyq ştabynyŋ müşelerı ügıt-nasihat nauqany kezınde Batys Qazaqstan jäne Aqtöbe oblystaryna baryp, öŋırdegı su tasqynynyŋ saldaryn öz közımen kördı.
«AMANAT» būl jaǧdaidy ünemı baqylauda ūstady. Sondyqtan dauys beru aiaqtala salysymen, deputattyqqa kandidattar delegasiiasy men partiia belsendılerı su basqan üilerdıŋ tūrǧyndarymen kezdesıp, gumanitarlyq kömek körsetu üşın osy aimaqtarǧa qaita jol tartty. Sondai-aq, amanattyqtar infraqūrylym nysandary men joldardyŋ jai-küiın tekseredı. Olar zardap şekkenderdıŋ barlyǧy keltırılgen zalal üşın ötemaqy alyp, aimaqtaǧy jaǧdaidy qalpyna keltıru üşın qajettı kömek turaly aqparat jinaidy.
Baǧdarlamamyzda bız elımızdegı infraqūrylymdy jaŋǧyrtudy, qala men auyl tūrǧyndaryn mausymdyq su tasqynynan qorǧap, gidrotehnikalyq qūrylystar jüiesınde tärtıp ornatudy közdegen bolatynbyz. Partiia özınıŋ sailaualdy baǧdarlamasyn ıske asyruǧa kırısıp kettı jäne bügınde asa özektı bolyp otyrǧan mäselenı tıkelei tötenşe jaǧdai oryn alǧan aimaqqa baryp şeşpek. «AMANAT» ärdaiym halyqpen bırge!”, dep jazdy ol.
