Elimizde Májilis pen máslıhat saılaýy ótkennen keıin Álıhan Smaıylov basqaratyn mınıstrler kabıneti otstavkaǵa ketýi múmkin. Memleket basshysy Qasym-Jomart Toqaev synnan kóz ashpaǵan Álıhan Asqanulyn otstavkaǵa jibere me, joq álde oǵan taǵy bir múmkindik bere me? Jalpy Úkimet qaıta jasaqtalsa, kim premer-mınıstr bolýy múmkin?
Saılaý kúni Álıhan Smaıylov óziniń otstavkasyna qatysty suraqqa jaýap berdi. Bir qyzyǵy onyń «Elimiz úshin árqashan eńbek etýge ázirmiz» degen sózi qyzyq bolyp tur.
«Parlament Májilisi qaıta saılanǵannan keıin Úkimet otstavkaǵa ketedi. Jańa Úkimet qaıta jasaqtalǵansha biz óz qyzmetimizdi atqara beremiz. Jańa Premer-mınıstrdiń kim bolatynyn Prezıdent sheshedi. Biz kez kelgen jaǵdaıǵa daıynbyz. Elimiz úshin árqashan eńbek etýge ázirmiz», - dedi Premer-mınıstr saılaý ýchaskesinde.
«Jańa Premer-mınıstrdiń kim bolatynyn Prezıdent sheshedi» jáne «Elimiz úshin árqashan eńbek etýge ázirmiz» degen sózge qaraǵanda Álıhan Asqanulynyń otstavkaǵa ketýge asyqpaıtyn sekildi. Jalpy Álıhan Smaıylovtyń ornyna kim premer-mınıstr bolýy múmkin? Osy jáne ózge de suraqqa belgili ekonomıst Maqsat Halyq jaýap berdi.
– Májilis saılaýy ótip, Parlament jańarǵannan keıin Úkimet otstavkaǵa ketý kerek. Shyn máninde aldaǵy kúnderi úkimet jańarýy múmkin be?
– Meniń oıymsha úkimet jańarýy kerek. Óz basym Úkimet jańarady dep senip otyrmyn.
– Qasym-Jomart Toqaev «Álıhan Smaılovqa taǵy bir múmkindik bereıik» dep aıtpaı ma?
– Ol da múmkin. Biraq ony Úkimet basshylyǵynda qaldyrmaǵany durys sııaqty.
– Ózińiz «Úkimet basshysy bolsa, tıimdi jumys ister edi» dep kimderdi aıta alasyz? Mysaly qazirgi kezde úkimet basshylyǵyna Erlan Qoshanov, Altaı Kólginov nemese Qanat Bozymbaev kelýi múmkin degen áńgimeler bar...
– Negizi «Myna adam premer-mınıstr bolsa, bári jaqsy bolyp ketedi» dep aıtý qıyn. Áıtse de men óz basym Ashat Aımaǵambetovtyń premer-mınıstr bolǵanyn qalaımyn. Sebebi ol joǵary qyzmette júrip halyqtyń alynda abyroıyn saqtap, kópshiliktiń súıispenshiligine bólendi. Eger Ashat Qanatuly Úkimetti basqarsa halyqtyń shamaly bolsa da úmiti oıanar edi. Men odan basqa adam kórip tuǵan joqpyn.
– Úkimet basshysynyń mamandyǵy gýmanıtarlyq saladan qaraǵanda bilikti ekonomıst bolǵany jón shyǵar? Qazir halyqtyń áleýmettik jaǵdaıy tym nashar bolyp ketti...
– Premer-mınıstrdiń mindetti túrde ekonomıst bolýy shart emes. Eń bastysy halyqtyń senimine ıe adam bolýy kerek. Al endi ekonomıkaǵa jaýapty mınıstrlikke Germanııanyń ekonomıka mınıstri bolǵan Erhard Lıýdvıg sekildi adam kerek.
– Qazirgi tańda Ashat Aımaǵambetov «Amanat» partııasynyń atynan depýtattyqqa túsip jatyr. Siz ózińiz Aımaǵambetovty depýtat retinde elestete alasyz ba?
– Negizi sol jaǵy qıyn boldy. Ashat Aımaǵambetovtyń depýtat bolǵanynan góri atqarýshy bılikte otyrǵany kóbirek paıdaly sekildi.
Sanaýly kúnderden keıin Úkimetti kim basqaratyny anyqtalady. Álıhan Smaıylov basshylyqtan ketip, onyń ornyna tegeýrindi premer-mınıstr kele me? Úkimet quramy jańarǵan kúnde mınıstrler kabıneti halyqtyń turmysyn túzeı ala ma? Myń san saýaldyń jaýabyn aldaǵy kúnderi biletin bolamyz.
Serik Qudaıbergenuly
