- Mereke Qulkenov - Qazaqstan Jazýshylar Odaǵynyń tóraǵasy.
Basqa kandıdat bolǵan joq...
Nurjan Qýantaı - birinshi orynbasary.
Baýyrjan Jaqyp - ekinshi orynbasary.
Qasymhan Begmanov - úshinshi orynbasary.
Ǵalym Qalıbek - tórtinshi orynbasary.
Beıbit Sarybaı - besinshi orynbasary, - dep jazdy.
Bes jylda bir ret ótetin jıynda aldymen QR Aqparat jáne qoǵamdyq damý mınıstri Darhan Qydyráli Memleket basshysy Qasym-Jomart Toqaevtyń jazýshylarǵa quttyqtaýyn jetkizdi.
Qazaqstan Jazýshylar odaǵynyń basqarma tóraǵasy, aqyn, Memlekettik syılyqtyń laýreaty Ulyqbek Esdáýlet bes jylda atqarylǵan jumystar jóninde eseptik baıandama jasady.
Ulyqbek Esdáýlet óziniń 15 eldiń qalamgerleri múshe retinde kirgen Túrki dúnıesi jazýshylar odaǵynyń tóraǵasy bolyp saılanýyna baılanysty qyzmetinen ketetinin málimdedi.
Jıynda sondaı-aq Memlekettik syılyqtyń laýreattary, jazýshylar Dýlat Isabekov, Kádirbek Segizbaev, aqyn-dramatýrg Iranbek Orazbaev, Májilis depýtaty, aqyn Qazybek Isa jáne basqalar sóz alyp, ádebıettiń tolǵaqty máselelerine toqtaldy.
Quryltaıdan soń basqarma jıynynda jazýshy, Qazaqstannyń eńbek sińirgen qaıratkeri Mereke Qulkenov Qazaqstan Jazýshylar odaǵy basqarma tóraǵasy bolyp saılandy. Sondaı-aq onyń orynbasarlary belgili boldy.
Aıta keteıik, qalamger-jýrnalıst Mereke Ábdeshuly Qulkenov 1951 jyly 8 qarashada Atyraý oblysy, Qyzylqoǵa aýdany, Qarabaý aýylynda týǵan. Qazaqstannyń eńbek sińirgen qaıratkeri, Qazaqstan Jazýshylar odaǵynyń múshesi, Almaty qalalyq máslıhatynyń depýtaty. Qazaqstan Respýblıkasy Prezıdenti syılyǵynyń laýreaty.
S.M.Kırov atyndaǵy Qazaq memlekettik ýnıversıtetiniń (qazirgi ál-Farabı atyndaǵy Qazaq ulttyq ýnıversıteti) jýrnalıstıka fakýltetin bitirgen (1978). Birneshe kitaptyń avtory. Solardyń biri — Rahymjan Otarbaevpen birlesip jazǵan «Bas» dramasy úshin Mádenıet mınıstrligi jarııalaǵan «Báıterek» respýblıkalyq baıkaýynda ekinshi júldege ıe boldy (2004 j.).
1970 jyly áskerı boryshyn ótep kelgennen keıin 1971 — 1973 jyldary Qazaqstan Kompartııasy Ortalyq Komıtetiniń gazet-jýrnal baspasy baspahanasynda baspagerdiń kómekshisi boldy. Ýnıversıtetti bitirgen soń buqaralyq aqparat quraldarynda «Qazaqstan pıoneri» gazeti, Qazaqstan telearnasy, «Pıoner» jýrnaly, «Qazaq ádebıeti» gazetiniń tilshisi,
1993-1997 jyldar aralyǵynda «Jalyn» respýblıkalyq qoǵamdyq-ádebı jýrnalynyń bas redaktory,
1997 jyldan beri «Ana tili» respýblıkalyq gazetiniń, 2000 jyldan osy ýaqytqa deıin «Tań-Sholpan» ádebı-kórkem, kópshilik jýrnalynyń bas redaktory,
1991 jyldan qazirgi kúnge deıin «Ólke» baspasynyń bas dırektory bolyp eńbek etip keledi. Sondaı-aq «Juldyz» jýrnalynyń bas redaktory qyzmetin qosa atqarýda.
«Qurmet» ordenimen, ulttyq jýrnalıstik syılyq «Altyn juldyz» t.b. birneshe medaldarmen marapattaldy.
