Jurnalist Gülmäriia Barmanbekova Almatyda ötken Zeinep Ahmetovamen kezdesu jaily pıkırımen bölıstı, dep jazady "Adyrna" portaly.
Ol özınıŋ äleumettık jelıdegı jazbasynda kezdesudıŋ barşa körermenge ruhani azyq bolǧanyn, Zeinep apanyŋ aitqan äŋgımelerı arqyly tärbielık ılımnıŋ artqanyn jazdy.
Kezdesu Almaty qalasy Mädeniet basqarmasy jäne "Adyrna" qoǧamdyq qorynyŋ ūiymdastyruymen ötken bolatyn.
"Ruhani älemım köpten susap jüruşı edı. Bügın şölım äbden qanǧandai boldym.
Zeinep apanyŋ (Ahmetova) kezdesuınen "semırıp" qaittym.
"Aldyŋda qazuly kör tūrsa da, şyndyqty aitudan jaltarma" deitın batyr Bauyrjan Momyşūly kelınınıŋ maqtauyn qalai asyrsa da jarasar edı, bıraq qainatasy sekıldı ol da maqtau süimeitının baiqatyp: "Maqtaudy köp estıgen adam şyndyqty joǧaltyp alady" dedı.
Ras-au, şyndyq tūrmaq özın de joǧaltyp alǧan adamdy kördık emes pe?.. Sonda sol adamǧa: "Qataryŋnan assaŋ da, halyqtan aspaisyŋ" dep, onyŋ janyndaǧylarǧa: "Jaqsynyŋ jaqsylyǧyn ait, bıraq jaǧympazdanba" dep aitatyn bır Bauyrjan tabylmai-aq kettı-au, şırkın!
Ūltqa qyzmet etudıŋ ölşemderı men jauapkerşılıgınıŋ anyqtamasyn Momyşūly bıraq auyz sözben jetkızgen eken.
"Ūltqa qyzmet etu degen eŋ aldymen ana tılın közınıŋ qaraşyǧyndai saqtau" deptı.
Körmegenge köseu taŋ dep, täuelsızdıktıŋ bastauyndaǧy şartaraptan aǧylǧan türlı aǧymdarǧa elıktep, bırımız Batysqa, endı bırımız Şyǧysqa auyp, öz salt-dästürımızdı ūmyt qaldyrdyq.
Batys jalaŋaştady, Şyǧys tūmşalady. Qūdaiǧa senu degen, mūsylman bolu degen osy eken dep, terıs aǧymdardyŋ jetegınde ketkender köp boldy.
Qazaq - tuǧannan mūsylman, ol arabtar kelmei tūryp-aq, "Qūdaisyz qurai synbaidy" degendı aityp qoiǧan. Qazaqtyŋ mūsylmandyǧy özgeşe. Qalai bolǧanda da ūlt dınnen joǧary tūrady. Öitkenı adam şyr etıp jerge tüskende belgılı bır ūlttyŋ ökılı bolyp tuady. Odan keiın baryp oǧan mūsylmandyq keledı.
"Adamǧa tabynba, jamanǧa jalynba" degen sözdı aitqan da bır Qūdaidy moiyndaǧan qazaq. Ol eş uaqytta arabtar qūsap qara tasqa tabynbaǧan.
Zeinep apanyŋ är sözı, ınju-marjandai tızılıp, maǧynaly oilary kezekpen qūiylyp jatty. Salt-dästür, yrym-tiymdar turasynda da tyŋ oilar aitty. Qazaqtyŋ är äreketınıŋ astary toly filosofiia dep kım oilaǧan. Mäselen balanyŋ tūsauyn kesuge arnalyp aq pen qara tüsten örılgen jıptıŋ mänı nede dep oilaisyz? Būl Qūdai ǧana jalǧyz, qalǧanynyŋ bärı jūptan qūralady degendı bıldıredı: aq pen qara, er men äiel, ülken men kışı, ūzyn men qysqa, t.s.s. bolyp kete beredı.
Qazaq er balanyŋ tūsauyn taiaǧyna süienıp zorǧa jürgen şalǧa emes, tepse temır üzetın jıgıt aǧasyna, qyz balanyŋ tūsauyn etegıne sürınıp tältırektegen kempırge emes, qol-aiaǧy balǧadai, qairaty tasyǧan jas kelınşekterge kestırgen eken. Joly aşylmaǧan dep, otbasyn qūrmaǧan jastarǧa kestırmegenın de Zeinep apanyŋ auzynan estıdık.
Qazaqtyŋ qyzdary tūrmysqa şyqqanǧa deiın oramal salmaǧan. Taqiia, börık, qasaba, soraba t.s.s. baskiım kigen. Qos būrymyna taqqan şaşbau, şaşteŋge, üzbe syŋǧyry qyzdyŋ jürısınıŋ özın ädemı, äuezdı, nazdy etıp körsetu üşın, qos būrymyndaǧy kümıs şaşbaudyŋ salmaǧy tömen tartyp, balǧyn müsınnıŋ jıptei tüzu bolyp qalyptasuy üşın taǧylǧan.
Osy keremettıŋ bärın bügınde köp qyzdar, ökınışke qarai, baiy ölgen qatyndar qūsap, qap-qara oramaǧa kömıp jıbergen.
Mūsylman bolu üşın arab boludyŋ keregı joq, qazaq bolyp qalsa jetkılıktı.
Jalǧyz bolyp qalady dep yrymdap, qazaq qyzdyŋ şaşyn eşqaşan jalǧyz būrym qylyp örmegen eken, qos būrym etıp nemese 12 tal etıp örgen.
Zaldan bır adam Zeinep apaǧa er men äieldıŋ teŋdıgı jaily ne oilaisyz degen saual joldady.
"Tırşılıkte teŋdık joq, adam ölgende ǧana teŋeledı", erkektıŋ qazanşy, äieldıŋ bazarşy bolǧany jaqsy yrym emes, ärkım tabiǧatynan berılgen öz ornyn bıluı kerek degen jauap aityldy. Aqyry teŋ eken, onda bır balany äielı, bır balany erıne tu dep aityp köreiık! Teŋese ala ma?
Er men äiel teŋespek bolǧan jerde dünienıŋ şyrqy būzylady. Ara da, jylan da gül jalaidy. Bıraq bırı bal, bırı u şyǧarady.
Şalbar kiiu degen osy eken dep, aldy kebejedei, arty tegenedei bolyp, ūŋǧyl-şūŋǧylynyŋ bärı būltiyp ketıp bara jatqan äiel zaty özın özı äşkereleitının oilamaidy-au! Şalbardy da kietın jerı bar jäne ol jarasatyndarǧa ǧana jarasady. Al tyrystyryp kiiu densaulyqqa öte ziian.
Kelın men ene arasyndaǧy qarym-qatynasqa bailanysty da qyzyq oilar aityldy. Kelın de tūlǧa, özınşe bır älem. Ene sol älemge ie bola almasa, kım bolǧany? Tūlǧa bolyp qalyptasqan jandy tärbielegısı kelse, enenıŋ üiretıp äure bolmaǧany abzal, qandai boludy özı körsetsın.
Zeinep apa 9 ūldyŋ ışındegı jalǧyz qyz bolǧan eken.
Apamyz osy künge deiın jazuşylar Odaǧyna sälem salyp kıredı. Atasy osylai amanattap ketıptı.
Şaiqalsa da qūlauy qiyn qazaq degen taǧdyrly halyqtyŋ batyry Bauyrjan Momyşūly:
"Ölgennen keiın de tırılerdıŋ ışınde jürem" degen eken. Zeinep apanyŋ bügıngı kezdesuınen şynymen de ol kısınıŋ däp osy teatr zalynyŋ qaq törınde qasqiyp tūryp, qalyŋ köpşılıkpen bırge otyrǧandai äser aldyq" dep jazdy ol.
