Apellıaııalyq sot tirkelmegen Dempartııa kóshbasshysy Janbolat Mamaıǵa shyǵarylǵan úkimdi ózgerissiz qaldyrdy. Bul týraly belsendiniń jubaıy, jýrnalıst Inga Imanbaı aıtty, dep habarlaıdy “Adyrna” ulttyq portaly.
Janbolat Mamaıǵa shyǵarǵan sot úkimi ózgerissiz qaldy. 6 jyl shartty túrde sottaldy, 6 jylǵa qoǵamdyq-saıası, jýrnalıstik qyzmetten shettetildi. Eshqandaı ózgeris joq. Búgin Janbolattyń oqshaýda otyrǵanyna 499 kún boldy. Kúres munymen toqtamaıdy. Endi Joǵary sotqa júginemiz, odan keıin BUU komıteti bar. Qanshama halyqaralyq uıymdar málimdeme jasady, BUU Jumys toby sheshim shyǵardy. Soǵan qaramastan, bılik repressıvti saıasatyn jalǵastyrdy. Saıası reforma, ózgeris degen osy ma?, – dep jazdy ol.
Eske salaıyq, Janbolat Mamaıǵa «Qasaqana jalǵan aqparat taratý» (274-bap), «Bılik ókilin qorlaý» (378-bap) jáne «Jappaı tártipsizdikter uıymdastyrý» (272-bap) boıynsha aıyptar taǵylǵan. Alǵashqy eki aıyptaý 2021 jylǵy oqıǵalarǵa, al úshinshisi 2022 jylǵy qańtardaǵy oqıǵalarǵa qatysty.
