Atyraudaǧy “Şaŋyraq” balalar üiıne qatysty jelıde taraǧan videoǧa Atyrau oblysy äkımınıŋ orynbasary Jasūlan Bisembiev pıkır bıldırdı, dep habarlaidy “Adyrna” ūlttyq portaly.
Aituynşa, bolǧan oqiǧa būryn qyzmet etıp ketken jūmysşy men būrynǧy basşy arasyndaǧy kelıspeuşılıkterdıŋ nätijesı eken.
“Otbasy ülgısındegı "Şaŋyraq" balalar auylyna qatysty bırneşe mäselenı aşyp aitqym keledı. Qazaqstan Prezidentı janyndaǧy Balalar qūqyqtaryn qorǧau jönındegı uäkıl Zakieva Dinara Bolatqyzymen bırge otbasy ülgısındegı "Şaŋyraq" balalar auylyna baryp, jaǧdaidy zerdeledık.
Tüigen oiym, soŋǧy kezde jelıde qatty talqylanyp jatqan jaǧdailar ūjymda būryn qyzmet etıp ketken jūmysşy men būrynǧy basşy arasyndaǧy kelıspeuşılıkterdıŋ nätijesı. Saldarynan balalar zardap şegıp jatyr. Jelıde jariialanyp jatqan türlı jazbalarda ekı tarap öz-özın aqtap aluǧa tyrysyp jatqanyn köruge bolady”, dep jazdy ol.
Sondai-aq, "Şaŋyraq" balalar auylyna jaŋa direktor taǧaiyndalatynyn da aita kettı.
”Ekınşıden, balany özıne tartyp, türlı video taratudyŋ artynda - balanyŋ qūqyǧyn şekteu mäselesı tūr.
Būl balalar - memlekettıŋ erekşe qorǧauyndaǧy balalar. Sondyqtan, memleket balalardyŋ qūqyǧyn qorǧauǧa arnalǧan barlyq şaralardy qabyldaityn bolady. Oǧan qosa, jelı de bolyp jatyrǧan jaǧdailar, balalardyŋ özderın qatty alaŋdatyp, bolaşaqtaryna kerı äserı bolady dep oilap otyrǧandyǧyn baiqadym.
Üşınşıden, "Şaŋyraq" balalar auylyna jaŋa direktor taǧaiyndalady. Qazırgı uaqytta konkurs jariialandy. Pedagogika salasynda mol bılımı men täjıribesı bar mamandardy osy konkursqa qatysuǧa şaqyramyn.
Törtınşıden, "Şaŋyraq" balalar auylyndaǧy beinebaqylau jüiesı küşeitıledı. Qazırgı uaqytta mūnda 64 beinekamera bar bolǧanymen, qosymşa kamera qoiu qajettılıgı bar dep esepteimın. Jäne kameralar tıkelei Bılım beru basqarmasyna qosylatyn bolady”, - dedı Jasūlan Bisembiev.
Sonymen qatar, balalar üiınde baspasöz qyzmetı aşylady. Ol balalar auylyndaǧy jariialylyqty qamtamasyz etedı. Odan bölek, juyq arada, Şaŋyraqtan tülep şyqqan balalardy ömırge tez beiımdeuge baǧyttalǧan tälımgerlık jobasy eŋgızıletının de aitty.
”Qūrmettı aǧaiyn, balalarǧa qatysty türlı videolar jariialap, aqparat taratudyŋ artynda balalardyŋ qūqyǧyn şekteu ärı qūqyqtyq jauapkerşılık mäselesı bar ekenın atap ötkım keledı.
Qazır būl mäseleler tūraqtalyp, balalar qalypty ömırge qaitqany maŋyzdy”, dep sözın qorytyndylady.
Aita keteiık, jelıde Atyraudaǧy «Şaŋyraq» balalar üiınıŋ tärbielenuşısınıŋ videosy taraǧanyn habarlaǧan edık.
