200 teńgelik banknota pen moneta zańdy tólem quraly sanalady. Bul týraly Ulttyq bank eske saldy, dep habarlaıdy “Adyrna” ulttyq portaly.
«Nomınaly 200 teńgelik banknotalardyń qabyldanbaı jatqany týraly ótinishterge baılanysty Qazaqstan Ulttyq banki olardyń zańdy tólem quraly sanalatynyn eske salady. Bul banknotalar Qazaqstan Respýblıkasynyń barlyq aýmaǵynda kez kelgen tólem túri boıynsha qabyldanýǵa mindetti», - delingen habarlamada.
Qarjy regýlıatory Qazaqstan aýmaǵynda aınalymdaǵy ulttyq valıýta banknotalary men monetalaryn belgilengen qunyna qaraı qabyldaýdan bas tartý – «Ákimshilik quqyq buzýshylyq týraly» Qazaqstan Respýblıkasy Kodeksiniń 206-babynda kózdelgen ákimshilik jaýapkershilikke jeteleıtinin eske salady.
«Buǵan qosa, Ulttyq bank nomınaly 200 teńgelik jańa banknotalardy aınalymǵa shyǵarmaǵanyn atap ótemiz. Aınalymdaǵy 200 teńgelik bankotalar zańdy kúshin joıǵan joq, ári tabıǵı tozyǵy jetkende ǵana aınalymnan shyǵarylyp, 200 teńgelik monetalarmen aýystyrylady. Qosymsha suraqtar týyndasa, 1477 nómiri arqyly Ulttyq Banktiń baılanys ortalyǵyna habarlasýǵa bolady», - delingen habarlamada.
