Qasym-Jomart Toqaev Täjıkstanǧa jūmys sapary barysynda Halyqaralyq Araldy qūtqaru qorynyŋ qūryltaişy memleketterı basşylary keŋesınıŋ otyrysyna qatysty, dep habarlaidy «Adyrna» tılşısı.
Jiynda Memleket basşysy ūiymdy odan ärı damytuǧa qatysty ūsynystaryn ortaǧa saldy. Aituynşa, qordyŋ ūiymdyq qūrylymy men şarttyq-qūqyqtyq bazasyn jetıldıru prosesın tezırek aiaqtau maŋyzdy mäsele bolyp qala beredı.
«Qordyŋ basqarmasy men Atqaruşy komitetınıŋ ökılettılıgın jäne jauapkerşılıgın keŋeitken jön. Memleketaralyq su şaruaşylyǧyn üilestıru komissiiasyn Memleketaralyq su-energetikalyq komissiia retınde qaita qūrudy ūsynamyz. Būl şaralar Qordyŋ tiımdılıgın arttyrar edı. Aimaqtaǧy barlyq eldıŋ irrigasiia, gidroenergetika jäne ekologiia salalaryndaǧy müddelerın eskere otyryp, Ortalyq Aziianyŋ su-energetika resurstaryn tiımdı paidalanu üşın ūzaq merzımdı ärı ornyqty aimaqtyq yntymaqtastyq mehanizmın qūru kerek. Bızdıŋ oiymyzşa, Halyqaralyq su-energetika konsorsiumy osyndai mehanizmnıŋ rölın atqara alar edı. Sondai-aq Aral teŋızı basseinındegı su resurstaryn esepke alatyn, monitoring jasaityn, basqaratyn jäne böletın bıryŋǧai avtomattandyrylǧan jüie engızu boiynşa jūmys josparyn äzırleu qajet. Būl bastamanyŋ jüzege asyryluy aimaqtaǧy sudy paidalanudyŋ aşyqtyǧyn qamtamasyz etıp, Ortalyq Aziia elderımen aradaǧy dialogty jäne dostyqty nyǧaituǧa yqpal etedı»,—dedı ol.Toqaev Araldy qūtqaru qorynyŋ kelesı kezdesuın 2026 jyly Qazaqstanda ötkızudı ūsyndy.
«Joǧary deŋgeidegı kelesı kezdesudı özım bastamaşy bolǧan BŪŪ aiasyndaǧy Aimaqtyq klimattyq sammitpen bırıktıre otyryp, 2026 jyly Qazaqstanda ötkızudı ūsynamyn»,—dep tüiındedı basşy.
Ūqsas jaŋalyqtar
