Qazaqstannyŋ Eŋbek Erı, bılıktı pedagog Aiagül Mirazova qoǧamda dau tudyrǧan mäselenıŋ bırı oquşylar arasynda oramal tartyp, bılım oşaǧyna mektep formasymen emes, hidjab kiıp keludı qūp köretınderge qatysty oiyn aitty, dep jazady "Adyrna" portaly. Būl turaly "Egemen Qazaqstan" jariialady.
«Bılım salasynda baiyrǧydan kele jatqan, ülgı alarlyq, önege bolarlyq mekteptıŋ kiım ülgısı bar. Täuelsız el atanǧanǧa deiın de oquşy atanǧan jastar arnaiy mektep formasyn kidı. Sodan oquşylar bılımsız, tärbiesız, tıptı dınsız boldy dei alamyz ba? Olardyŋ imanynyŋ älsıreuıne, bılımınıŋ tömendeuıne mektep formasy äser ettı deu qisyndy ma? Ärine joq! Sapaly bılım aldy, önegelı tärbiemen eseidı mektep qabyrǧasynda olar. Älı de solai. Bıryŋǧai forma ne üşın qajet? Bai men baǧlannyŋ balasy da, qarapaiym otbasynyŋ oquşysy da bıryŋǧai kiım ülgısımen jüredı. Ata-ana da bäsekelestık dep bas auyrtpaidy, balanyŋ da köŋılı būzylmaidy äleumettık teŋsızdıktı oilap. Onsyz da türlı reformany bastan ötkerıp, alaǧai da būlaǧai baǧdarlamalarǧa maltyǧyp qalǧan mektepte endı kiım ülgısın retke keltırdık pe degende hidjab, oramal mäselesı dürkın-dürkın köterılıp jatyr. Qai zamanda qazaqtyŋ qyzy qara jamylyp, tars bürkenıp edı? Ata-babamyz islam dının ūstanbady ma? Bes uaqyt namazyn qaza qylmai ötemedı me? Olar qai qyzyna hidjab kigızıp, tūmşalady? Qazaq qan jūtqan
qaiǧynyŋ ortasynda da qara tüstı kiım kimegen. Aq oramaldy qyzy jat jūrttyq atanyp, özge üidıŋ bosaǧasynan kelın bolyp oŋ aiaǧymen attaǧan sätten bastap tartqan.
Ǧūmyrymnyŋ elu jylǧa juyq uaqytyn ūstazdyqqa arnadym, älı de osy salada eŋbek etıp kelemın. Keiıngı kezde jylt etpe jyltyraqqa äuestıgımız artyp, özgenıŋ saltyna yqylasymyz ūlǧaiyp bara jatqandai körınedı. Jyl saiyn jaŋa oqu jyly bastalǧannan oramal men hidjab dauy örşidı de, soŋǧy qoŋyrauǧa deiın ūlasady. Mektep – bılım närın qūiatyn orta, balanyŋ keleşekte qandai mamandyq iesı atanaryna baǧdar sılteitın şaŋyraq. Zaŋ talaby barlyǧyna da bırdei oryndalady, bärı de soǧan baǧynuy tiıs. Bala kämelettık jasqa tolyp, özı şeşım qabyldaityn kezeŋge jetkende erkı bıledı qandai kiım kietının. Sondyqtan kez kelgen ata-ana balasyn mektepke oranyp keluın emes, bılım alsyn, oqysyn, bılıktı maman atanuyna jol aşylsyn dep qadaǧalauy kerek. Ata-ana özınıŋ ūstanǧan baǧyty, oi-pıkırı dūrys-būrystyǧyn eskermei balasyna taŋyp, mäjbürlep teli beruıne bolmaidy dep sanaimyn. Barlyq bala bırdei, emın-erkın oinap, jadyrap jainap jürıp qatarlastary sekıldı bılım aluǧa tolyq qūqyly. Bılım salasyndaǧy talap bıreu ǧana bolyp, sol talapty oryndauǧa ata-ana da, ūstaz da, memleket te mındettı boluy tiıs dep oilaimyn», dedı Aiagül Mirazova.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz