Aýdan ákimderiniń saılaýy bastalmaı jatyp-aq kandıdattarǵa qysym jasalǵan. Ásirese, Abaı oblysynda erekshe shıelenisip tur. Ákim laýazymyna úmitker Aıjan Sabyrqyzy Muqataeva óz mandatyn qalpyna keltirý úshin aıtarlyqtaı qıyndyqtarǵa kezdesken.
Ol qujattarynyń túpnusqalyǵy týraly naqty dálelder keltirip, advokattyń kómegine júginýge májbúr boldy. Kútpegen jaǵdaıdyń qarjylaı shyǵyny bir bólek, saılaý naýqanyna da kesiri tıdi.
Abaı aýdandyq saılaý komıssııasynyń 2023 jylǵy 7 qazandaǵy №6 hattamalyq sheshimimen A. Muqataeva Qazaqstan Respýblıkasynyń Memlekettik qyzmet salasyndaǵy zańnamasynyń talaptaryna sáıkes dodaǵa túsýden shettetildi. Qajetti eńbek ótili men zeınetaqy jazbasynyń sáıkestigin eskermesten sony ilik etip birjaqty sheshim shyǵarǵan bolatyn.
Alaıda, keshe (11.10.2023 j. №1094-23-00-4/535 is) Semeı qalasynyń sýdıasy M. N. Zavalov kandıdat Aıjan Sabyrqyzynyń ákimshilik talabyn ishinara qanaǵattandyrdy. Sot Abaı aýdandyq saılaý komıssııasyn Muqataevanyń qujattaryn qabyldaýǵa jáne sot sheshimi zańdy kúshine engennen keıin ony Abaı aýdany ákiminiń laýazymyna kandıdat retinde tirkeýge mindettedi.
Dál osy sot sheshimi “Ádiletti Qazaqstan” qaǵıdattarynyń tórge ozýynyń jarqyn mysaly emes pe?! Kandıdattardyń quqyqtary qyzǵyshtaı qorǵalǵany jáne saılaý kezinde zańdylyqtyń saqtalǵany ıgi. Sonymen qatar, bul sheshim sot táýelsizdiginiń mańyzdylyǵyn jáne onyń azamattyq quqyqtar men bostandyqtardy qorǵaýdaǵy rólin kórsetedi. Óz aldyna derbes bıligi bar sot organdarynyń ádilettilikti qalpyna keltirýge jáne saılaý komıssııalary jibergen qatelikterdi túzetýge daıyn ekendigin kórsetedi.
Endi ol óziniń saılaýǵa qatysý quqyǵyn jáne basqa kandıdattarmen básekelestikti tolyq senimmen jalǵastyra alady.
Aıta keteıik, Aıjan Muqataeva - memlekettik qyzmette de, bıznes salasynda da mol tájirıbesi bar bilikti kandıdat. Ol Ekonomıka jáne bıýdjettik josparlaý mınıstrliginde, sondaı-aq ekonomıkalyq zertteýler ınstıtýtynda jumys istegen. Sonymen qatar, “Atameken” UKP Isker áıelder keńesiniń múshesi retinde qoǵamdyq saladaǵy belsendi rólin atap ótýge bolady.
Odan bólek Aıjan Muqataeva Koreıa damý ınstıtýtynyń túlegi, bul onyń kásibı ósý men damýǵa degen umtylysynyń aıǵaǵy ispettes. Onyń saılaýǵa qatysýy demokratııalyq proesterdi damytýdaǵy jáne Qazaqstandaǵy ádildik pen zańdylyq qaǵıdattaryn saqtaýdaǵy mańyzdy qadam sanalady.
