Almaty qalasy turǵyn úı keshenderiniń birinde turǵyndar sýsyz, jaryqsyz, ınternet jelisiz qaldy. Jaǵdaıǵa ruqsatsyz, eshqandaı maquldaýsyz salynǵan kólik jýý beketiniń qurylysy sebep boldy deıdi olar. Máseleniń búge-shúgesin «Adyrna» tilshisi «Gúlder» turǵyn úı kesheniniń halqynan surap bilip qaıtty.
«GÚLDERGE» SÝ MEN JARYQ BERMEGEN KIM?
Almaty qalasy Raıymbek dańǵyly boıyndaǵy byltyr ǵana qoldanysqa berilgen «Gúlder» turǵyn úı kesheniniń jurty sýsyz, jaryqsyz qalyp daý kóterdi. Tosynnan bolǵan jaǵdaıǵa ǵımarat mańyndaǵy alańqaıǵa salynyp bastalǵan «Akva Robot» JShS qurylysy boldy. Anyqtalǵan derekke sáıkes qurylys ıeleriniń kim ekeni 8 qazan kúni belgili bolǵan. Turǵyn úı kesheniniń ortaq sý qubyryna jalǵaý úshin jer qazyp birneshe kún boıy qurylys jumystaryn júrgizgen.
Saldarynan aımaqtaǵy jurt sýsyz, jaryqsyz qalyp, on eki qabattyq ǵımarat lıft qyzmetinsiz qalǵan.
Soraqysy – jaǵdaı týraly qurylys ıeleri tarapynan da, turǵyn úı kesheniniń ıeleri «BI Client Service» JShS-nan da, ákimshilikten de eskertý bolmaǵan.
ShENEÝNIK «KÚShIN JOIDY» DEGEN QUJAT SAITTA TUR
Turǵyndar tıisti organdarǵa hat jazyp, aryz-shaǵymdaryn ýaqytyly jetkizip úlgergen. Nátıjesinde 16 qazan kúni keshki ýaqytta Naýryzbaı aýdandyq ákimdigi men «BI Client Service» JShS jáne Almaty qalasynyń memlekettik sáýlet-qurylys baqylaý basqarmasynyń ókilderi halyqpen kezdesip jaǵdaıǵa qatysty máselelerdi sheshetinderin aıtty:
««Tehnıkalyq qyzmetter júrgizýge ruqsat qujat júzinde 2015 jyly berilgen. Qazirgi tańda sol qujat kúshin joıdy. Sáıkesinshe zań boıynsha ruqsat bolmaǵandyqtan «Akva Robot» JShS-nyń qurylys júrgizýge eshqandaı quqyǵy joq. Biz eshqandaı kelisim, ruqsat bergen joqpyz. Qurylys jumystary zańsyz túrde júzege asty. Tıisti shaǵymdar qabyldanyp sharalar qoldanylatyn bolady» dep jaýap berdi Naýryzbaı aýdany ákimdigi apparatynyń kommýnaldyq qyzmet bóliminiń jetekshisi Jandos Takebaev.
Sondaı-aq, halyq aldynda Almaty qalasynyń memlekettik sáýlet-qurylys baqylaý basqarmasynyń mamandary da qurylys jumystaryna eshqandaı ruqsat bolmaǵanyn aıtyp, tıisti sharalar qoldanatyndaryn alǵa tartty.
Deı turǵanmen, Almaty qalasynyń jer qatynastar basqarmasynyń resmı saıtynda «Akva Robot» JShS-ne atalǵan meken-jaı boıynsha jerge ornalastyrý jobasyn bekitý týraly qujat kórsetilgen. Jaýapty tulǵalar bul qujat týraly eshteńe bilmeıtinderin taǵy aıtty.
JOǴALǴAN JARYQ PEN USTATPAITYN JELI
Jaǵdaıdy bir aptanyń ishinde retteımiz jaýapty tulǵalar «Gúlder» turǵyn keshenindegi ınternet jelisiniń nasharlyǵyna qatysty oı bildirdi.
«Bir kún boıy sý, jaryq bolmady. Qazir ózderińiz bilesizder. Jaryqsyz bir saǵat ta ómir súrý múmkin emes. Lıft te istemeı tentirep qaldyq. Eń quryǵanda eskertýleri kerek edi. Bul isteri durys emes. Ony qoıa bergende bizdiń turǵyn úı kesheninde Beeline-nan basqa jeli ustamaıdy. Basqa jelilerdiń provaıderleri ornatylmaıdy. 2000-nan asa halyq turatyn, bes-alty bloktan turatyn úıdiń bári bir provaıderge ornatylyp, keshke bárimiz ınternetke kirsek paıdalaný múmkin bolmaı qalady» dedi Almat esimdi turǵyn.
Ákimdik halyqtyń jelige qatysty aryz-shaǵymyn qarastyratynyn aıtyp, ýádelerin úıip tókti.
Almaty qalasyndaǵy jekelegen aýdandar men qala tóńireginde sońǵy kezderi jıi jaryq óship qalatyn bolyp júr. Máselen, 15 qazan kúni túnde Almaty oblysy Irgeli aýdanynda ornalasqan «Asyl arman» turǵyn úı kesheni turǵyndary jaryqqa qatysty bitpeıtin máseleni sheshý úshin Almaty – Tashkent kúre jolyn jaýyp tastaýǵa tyrysqan. Turǵyndar sonda úılerinde sý joq ekenin jáne gaz plıtasy tikeleı elektr qýatyna qosylǵandyqtan, úı salqyn bolyp turǵanyn aıtqan.
