Jelide eks-prezıdent Nursultan Nazarbaev pen onyń inisi Bolat Nazarbavpen kezdesip, birge túsken sýreti tarady. Bul týraly jazýshy Beıbit Saparaly Facebook paraqshasyna jazdy, dep habarlaıdy “Adyrna” ulttyq portaly.
Jazba boıynsha, Nursultan Nazarbaev Almatyǵa densaýlyǵy syr berip jatqan inisine barǵan. Olardyń qasynda qańtar oqıǵasyna qatysty tergelip jatqan nemere inisi Samat Ábish bar. Fotosýrettiń naqty kúni belgisiz.
“Qarasha, jeltoqsan men sol bir eki aı” degendeıin, jańa aı men jańa aptadan kóp jaqsylyqtar, yrys-bereke kúteıik! Sóıte tura ótken apta sońynda el ishin eleń etkizgen eks-Prezıdent otbasyna baılanysty shuǵyl jaǵdaıǵa oraı óz jeke kózqarasymyzdy kópshilik oqyrman nazaryna usynaıyq. Bizge jetken senimdi aqparat deregi boıynsha ústimizdegi 2023 jylǵy qyrkúıek aıynyń basynda Nursultan Ábishuly Almatyǵa jeke jumystarymen kelip, birneshe kezdesýler ótkizip, artynsha týǵan aýylyn, týyp-ósken qara shańyraǵyn, Úshqońyr jaılaýyn, ata-babalar jerlengen qorymyn zııarat etken eken. Shamalǵan-Úshqońyrdaǵy qara shańyraq úıine etjaqyn týystaryn jınap, kópten beri kórispegen ini-qaryndas, kelinderimen bir dastarhan basynda suhbat quryp, qordalanyp qalǵan ishki áýlettik máseleler boıynsha ashyq pikir almasqan. Eskertpe men ókpe-renishterin de jasyrmaǵan. Basqosý sońynda Ábish ákeleri bir ǵasyrdaı ýaqyt burynda aýlaǵa óz qolymen ekken, qazirgi tańda esik aldynda jaıqalyp ósip turǵan záýlim emen aǵashynyń janynda turyp Nuraǵańnyń maquldaýymen barlyǵy estelikke sýretke túsken”, dep jazdy ol.
Sondaı-aq, jazýshy Bolat Nazarbaevtyń aýyr hálde ekenin jazdy.
“Eki jyldan astam ýaqyt boıy múldem sóıleýden qalyp, óz aıaǵymen júre almaǵandyqtan sal bolyp qol arbaǵa tańylǵan, “aýrý adam ashýshań, tyrysqaq keledi” dep sál nársege kóńili qalyp bulqan-talqan kúı keshetin Bolat Ábishulyna qoshtasar sátte saýyǵyp ket dep barlyǵy da sol jerde jaqsy duǵa-tilekterin jaýdyrǵan. Sodan beridegi eki aı ishinde óz elimiz ǵana emes, búkil álemde saıası ahýal qatty ýshyǵyp, ár-ár tustan qarýly qaqtyǵystar men soǵys órti tutanyp ketti. Qandaı erekshe kútim, em-dom sharalaryn qoldanyp baqqanmen jetpis jastaǵy Bolat Ábishulynyń densaýlyǵy kún sanap kúrt nasharlaı berip, kúni keshe óte aýyr halde Almatydaǵy Ortalyq klınıkalyq aýrýhanaǵa jedel járdem kómegimen jansaqtaý bólimine jetkizilgen. Álbette, máńgilik ómir súretin esh pende joq. Jalǵan ǵumyr sholtań etip óte shyqpaqshy. Jan tapsyrý, tánnen rýhtyń shyǵýy da meılinshe qıyn úrdis. Tozańnyń salmaǵyndaı jaqsy jáne jaman isteriń tarazyǵa tartylatyn máńgilik aqyret álemi barsha qudaıdyń quldaryn alda baıyppen kútip tur. Qabir suraýy, qabir azaby, qabirdegi jánnatı hal bile-bilsek bar pendege tym jaqyn”-, dep jazdy Beıbit Saparaly.
Sonymen qatar, ol 2019 jylǵy saılaýdan keıin, ásirese 2022 jylǵy qańtar qasyretinen soń Nazarbaı áýletine qaratylǵan syn pikirler men suraýlar tym kóbeıip ketkenin aıtady. Oljas Súleımenov, Myrzataı Joldasbekov, Baltash Tursynbaev, Amangeldi Shabdarbaev, Sát Toqpaqbaev, Berdibek Saparbaev, Ákejan Qajygeldın, Álnur Musaev, Nartaı Dútpaev, Ádil Shaıahmetov, Jaqsybek Kúlekeev, Serik Ábdirahmanov, Álıhan Baımenov, Rátbek qajy Nysanbaıuly, Ǵazız Aldamjarov, Aslan Mýsın, Oralbaı Ábdikárimov, Ǵalymjan Jaqııanov, Muhtar Áblıazov, Vıktor Hrapýnov, Jaqsybek Bázilbaev jáne t.b. qaıratkerler ashyq suhbat alańyna shyǵyp, táýelsizdiktiń alǵashqy otyz jylyndaǵy san qıly oqıǵalarǵa óz turǵysynan baǵa berip jatqanymen, ádil de tolymdy jaýapty qalyń qaýym áli de ózgelerden asyǵa kútýmen bolǵanyn jazdy.
“Bul oraıda aldaǵy ýaqytta Nurtaı Ábiqaev, Asqar Qulybaev, Imanǵalı Tasmaǵambetov, Bolat Ótemuratov, Ádilbek Jaqsybekov, Ahmetjan Esimov, Mahmud Qasymbek, Darıǵa Nazarbaeva, Taıyr Mansurov, Qaırat Mámı, Tımýr Qulybaev, Kárim Másimov, Muhtar Altynbaev, Danıal Ahmetov, Tóleýtaı Súleımenov, Berlın Irıshev, Baqytjan Saǵyntaev, Serik Úmbetov, Saǵymbek Tursynov, Shalbaı Qulmahanov, Ómirzaq Shúkeev, Oraz Jandosov, Marat Tájın, Altynshash Jaǵanova, Birǵanym Áıtimova, Baqyt Ospanov, Sııazbek Muqashev, Qyrymbek Kósherbaev, Gúlshara Ábdiqalyqova, Toqtar Áýbákirov, Talǵat Musabaev, Alık Shpekbaev, Amandyq Batalov jáne t.b. aıtylmaı qalǵan tulǵalar birneshe saǵattap ashyq suhbat berip, búkpesiz óz oılarymen, dáleldi baılamdarymen pikir bólisedi dep úmittenemiz. Neǵurlym pikir alýandyǵy bolsa, soǵurlym ótkendegi tarıhı oqıǵalardy baǵalaýǵa týra jol ashylmaqshy”, dep jazdy.
Jazýshy “kórinbeı” ketken Nursultan Nazarbaevtyń kitap jazý ústinde ekenin de aıta ketti.
“Nursultan Ábishuly sońǵy birneshe jyl ishinde ǵumyrnamalyq qomaqty kitap jazý ústinde ekendiginen habarymyz bar. Jaqyn arada ol eńbek jaryq kóretin bolsa kópshilikti tolǵantyp júrgen birqansha suraýlarǵa naqty jaýap alamyz ba degen úkili úmitimiz de joq emes. Memýardy oqyǵan soń suraýlar men syn pikirler de qardaı boraıtyny aqıqat. Jasy ulǵaıǵanyna qaramaı ol ótkir saýaldarǵa da ilkimdilikpen jaýap beretin bolsa kóptegen aqtańdaq máseleler qupııasy jarııaǵa shyǵyp, keler urpaqqa aıqyn baǵdarshy bolar edi. Mine, sonan soń Nursultan Ábishuly qazaq jáne orys tilderinde keń aýqymda ashyq suhbattar beretin bolsa, el basqarýǵa bel sheshe kirisken kelesi urpaq býynyna tarıhı sabaqtyń jumbaq qatparlary jáne ashyla túspektigine berik senim bar”, dep qorytyndylady.
Aıta keteıik, buǵan deıin Qaraǵandy shahtasynda bolǵan qaıǵyly oqıǵaǵa Nursultan Nazarbaevtyń kóńil aıtpaǵanyn, keıin onyń densaýlyǵy nazar aýdarta bastaǵanyn jazǵan edik.
